Kum a thar a, khawthlang zaithiamte ang bawkin keini lam zaithiamte pawhin project thar nen an rawn inchhawpchhuak leh hlawm ngei ang. Chung zingah chuan zaithiam ngainat hlawh em em, a hla zawng zawng an zawm dual dual theih BZI Tochhawng a tel ngei e.
Kawrtethawveng nula zaithiam, Durtlang North-a khawsa BZI Tochhawng hian kumin hian project thar hmachhawp a nei nual. Kumina a project neih zingah hla thar neih a tel. A hla thar pawh kum thar tir lamah min hlui a tum a, a tihhlawhtlin ngei pawh kan beisei pui e.
‘Ka Dawn Ngam Lo’ hitmaker hian hla thar tihchhuah thuai a tum a. Tun dinhmunah a hun tak sawi thei lo mah se, a inruahman deuh dan chuan March thla vel hma chuan tihchhuah a tum tih sawiin, “Pathian zarah kan tihlawhtling thei a nih chuan, kumin March thla vel hma hi chuan hla pakhat chu tihchhuah ka tum a. Tunah hian kan buaipui deuh tan a. Engtikah tak nge kan tihchhuah theih dawn tih erawh ka la sawi chiang thei lo,” tiin Thalai Times a hrilh.
BZI Tochhawng hian eng lam hawi hla nge tih lam erawh a la sawi duh lo va, a hla thar tur hming pawh engmah sawi a la nei lo. A sawi lawk ve theih deuh chu, kumina a solo rimawi thar hmasa ber min hlui hnuah mi dang a thawhpuina hla thar pawh buaipui an tum tih thu a ni.
Ti daih ila, BZI Tochhawng hi mi zawng zawng ngainat hlawh emaw tih mai tur hi a ni, a hla zawng zawng pawh hi mi hriat hlawh vek thei a ni. Hengte avang hian hunpui lai pawh khan zai tura sawm hlawh ber ber zinga mi a ni thei a. Zan khatah hmun thum vela zai chang a ngah hle a ni. Hunpui lai pawh khan kan zaithiamte zinga a sum ang zawng pawhin thawkchhuak tam ber zinga mi a ni tih a chiang.
Hetih lai hian, Andhra Pradesh atanga nurse zir chhuak ngat ni mah se, tun dinhmunah rimawi khawvelah a hun tam zawk hman a la duh a, a tum bawk a. Kuminah pawh project thar a nei nual a, a hun tur chu la sawi chiah lo mah se, rimawi khawvel chhuahsana midangte tana rawngbawla nurse hna zahawm tak thawka a hun pum pek hun a la nei dawn tih BZI Tochhawng hian Thalai Times a hrilh bawk.
Eng pawh ni se, rimawi khawvela a cham chhungin thu leh hla mawi leh tha tak takin tihausa mawlh mawlh teh se.