US President Donald Trump-a chuan Greenland neih a tumna kal zelah Nobel Peace Prize a dawn loh hnuah muanna ringawtin a rilru a luah tawh lo tih a sawi.
Norway Prime Minister Jonas Gahr Støre-a hnena lehkha a thawnah Trump-a hian chawimawina a dawn loh chungchangah an ram sorkar chu a puh.
Trump-a a chhannaah Støre-a hian October thlaa Venezuela-a eptu hruaitu, María Corina Machado-i hnena Nobel Peace Prize hlantu chu committee hrang daih a ni a, Norway sorkar a inrawlh lo tih a hrilh.
“Indona pariat chuang ka tihtawp pawhin i ramin Nobel Peace Prize min pe lo va, muanna chauh ka ngaihtuah tawh dawn lo va, US tana hlawkna leh tha tur chauh ka ngaihtuah tawh dawn a ni,” tiin Trump-a’n Støre-a hnena thu a thawnah hian a ziak tih US chanchinbuten an tar lang.
“Greenland hi a puma kan neiha kan thunun loh chuan khawvel hi a him dawn lo,” a ti bawk.
Prime Minister Støre-a hian text message hi Pathianni khan a dawng a, Finland President Alexander Stubb-a nen Trump-a hian a thawn niin a sawi.
Støre-a hian US-in Greenland a chuh avanga a dodaltu ramte laka chhiah lak a tumna chu an duh lo va, boruak tihdaih a tul a, inbiak pawh a rawt niin a sawi.
Trump-a hian kum tina hlan thin chawimawina hi a dawng duh tih hi a zep lo va. US-in an ram him nan Greenland a mamawh tih pawh langsar takin a sawi bawk.
Mihring cheng tlem awmna, leilung hausa hi Arctic thliarkar hi missile-a beihna hriat hma theihna leh heng lai vela lawng che vel thlirna remchang tak a ni thei dawn.
Trump-a hian US-in Greenland lei a duh tih a sawi a, a tul a nih chuan Nato-a a tanrualpuite duh loh anga sipai chakna hmanga lak pawh a hnial lo bawk.
Kartawpah khan a duh dan dotu Nato ram pariatte atanga bungrua an lak luhah February atangin chhiah 10% a la dawn tih a sawi a, Greenland a nei hman lo a nih chuan June-ah 25%-ah tihpun a tum bawk.
Støre-a hnena thu a thawnah hian Denmark-in Russia leh China lakah Greenland a him thei lo tih ziakin, “Engvakin nge neitu nihna an neih? Ziaka dah a awm lo va, kum za chuang kal tawhah lawngleng chawlhna a ni a, keini pawhin lawng kan chawlhtir e bawk,” a ti.
“A din hnuah kei aia Nato tana thil ti tam an awm lo va, tunah hian US tan an ti ve tur a ni,” a ti bawk.