Tottenham Hotspur chuan an head coach Thomas Frank bân chungchang an ngaihtuah tan niin khawthlang chanchinbute chuan an tar lang a, Thawhlehni zana Champions League result azirin he chanchin i chhiar lai chuan an lo inbân fel tawh hial mai thei.
Thla sarih vel lek London khawpuia la cham coach lakah hian rinna nghah an harsat tan.
Danish coach hian nipui lai khan Brentford chhuahsanin Spurs a zawm a; mahse, an beisei angin a a thawk lo thung a. Heti chung hian club thuneitute chuan a chunga rinna nghah an thlang a, zawi zawia Premier League team ngheta Brentford a din dante chu inhnem nan an hmang.
Mahse, Spurs hian Inrinni zan khan West Ham chu league-ah 2-1 in an ngam lo a, tun season-a Premier League team tha lo ber pawl laka an tlawm hnu hian thuneitute chuan ngaihtuahna thar an seng niin an sawi.
London club hotute hian Frank hi la nghah rih hret nge tha ang bân nghal mai tihah thutlukna an la siam fel thei lo va, league-ah 14-na an ni mek a, league-a an inlan vawi 22-ah vawi sarih chiah an la chak.
Hammers laka an tlawm tumin Spurs fan-te chuan, “Naktukah an bân dawn che,” tiin an an au el a, Brentford-a hlawhtling tak coach hi bân pawh ni se pawi an ti lo tih a chiang.
FA Cup leh League Cup atangin an tla tawh a, Champions League-ah 11-na niin he inelnaah tal hming chher an mamawh hle a, nizan khan Borussia Dortmund an mikhual.
Spurs leh German club hian point 11 ve ve an nei mek a, damkhawchhuah theihna tura chak mamawh ve ve an ni.