Aizawl: Aizawl North III bialtu MLA, K Sapdanga chuan a bial chhunga infiamnaa hlawhtlinna chang, Lalthazuala, Chanmari West, (badminton) leh Lalnunsanga, Electric Veng (motor cycle racing) te chu a Office Chamber-ah nimin khan lawmpuina thuziak leh pawisa a hlan.
MLA chuan, “Ka bialah infiamna lama hlawhtlinna chang lawmpui phu em em kan nei hi ka lawm hle a, Mizoram mai ni lo, India ram pum huap pawha Mizoram infiamna lama min tihmingthatu tlangval chhuanawm pahnih kan bialin kan nei hi ka chhuang a, hma lam pana kal zel turin duhsakna ka hlan a, an hma lam hun zelah a theih ang anga tangkai ve zel ka inhuam a, hlawhtlinna ropui zawk chang zel turin ka beisei tlat che u a ni,” a ti.