Rel hmangin kan kawtkai maiah kan ram tlawhtute an rawn lut ta ruih ruih a, media khawvelah Mizoram a lang hnem chho ta hle.
Hmasawnna hnathawh hian min luhchhuahin, nitin kan chenna khawvela bet a ni chho ta reng mai. Kan duh emaw duh lo emaw heng kan ram rawn tlawhtu hrang hrangte hi kan chenchilh zual chho telh telh dawn a, keimahni lam pawh kan lo inbuatsaih ve a tul awm e.
Khualzinte dawr nuam leh biak nuamin awm ila, kan dawrkai leh chawlhna dawr neitu hrang hrangte pawhin hnathawka kan chhawrte thlengin kan fimkhur a, tlema hnamdang tawng hre deuh tur kan thlan thiam chhoh pawh a tul viau.
Kan ram hmel lanna tur hi keimahni kan ni thei reng tawh a, zahawm leh hawihhawm tura kan inhrilh a, kan inzirtir fo pawh a tul ta hle.
Faina kawng thlenga kan inruahman lawk thiam a, kan chetvelna hmun hrang hrang kan tihfelfai thiam pawh a tul viau. Hetiang ti tur hian nitin kan inhrilh a, kan inruahman ve pawh a tul ta.
Hnamdang khualzinte hian kan ram mawina hi hmuh an rawn duh tam telh telh dawn a, kan kawtkai maiah rel hmanga lo luh theih a nih tawh avangin a huho thlenga rawn tlawh hi an chak sauh sauh dawn, keimahni lam hi lo inpeih ila, kawng hrang hrangin hmasawnna ke pen i lo tum zel ang u.