Aizawl: Tourism Minister Lalnghinglova Hmar-in Ningani khan Guwahati Mizoram House-ah thu thar thehdarhtute kawmin, Covid-19 boruak reh hnuah a kum telin Mizoram tlawhtu an pung tih sawiin, Aizawl chu India rama Krismas khawpuia siam an tum tih a sawi.
Lalnghinglova Hmar chuan Aizawl chu India krismas khawpui, ‘Christmas capital of India’-ah chantir an duh thu a sawi a, “Thlasik boruak nawm lai takin Lammualah ‘Winter Festival’ buatsaih a ni a, mipuiin an hlut a. December 23 & 24-ah Aizawl khawpuia kawng lun lai ber chu ‘No vehicle zone’ niin mihring tan hawn a ni a, intihhlimna buatsaih a ni thin. December 23-ah ‘Christmas Parade’ hlimawm tak neih thin a ni bawk,” a ti a. December 26-a ‘Krismas Ruaitheh’ chu India ram hmun danga awm ve lo, Aizawl leh Mizoram krismas lawm dan tihlutu leh chhim tichakawmtu a ni, a ti. December 31-ah Sakawrhmuituai tlang mawi tak atangin music nen a huhova kumhlui thlahho thin a nih thu a sawi bawk.
Minister chuan Aizawl chu traffic dan zawm thatna leh bengchhen lohna, ‘Silent City’ a nih thu pawh sawiin, “Hei hian khawpui nun a tihahdam a, Ministry of Housing & Urban Affairs pawhin Mizoram sorkar hnenah ‘Special Award’ a hlan. Award hian Mizo mipuite chu tlawmngai tak leh mi dang ngaichang thiam an nih a lantir,” a ti.
Mizoram tlawhtuten tih tur leh tlawh tur an hriat a, hun nuam leh hlimawm tak an hman theih nan ‘Tourism Event Calender 2026’ buatsaih a ni tih minister chuan a sawi bawk.
Covid-19 boruak reh hnuah a kum telin Mizoram tlawhtu an pung tih sawiin, “State lian zawkte nen khualzin zat ngau ngau khaikhin chi ni lo mah se, kum 2023 atanga 2024-ah zaa 130 chuangin tlawhtu an pung a, kum 2025-ah pawh a let deuhthaw, zaa 96.9-in an la pung a. Hei hian Mizoram chu tourist-te tlawh chak ber zinga mi a ni zel tih a lantir a, kum 2026-ah pawh India-a tourist destination thlanawm ber zingah kan tel ka ring tlat,” a ti.
Tourism Minister hi R. Lalrodingi, Director, Tourism Department; Saithangpuia Sailo, DRC, Mizoram House, Guwahati; H. Lalramenga, PS leh Rosie Liannguri, Inspector of Statistics, Tourism Department ten an tawiawm a ni.