Aizawl: Fisheries department chuan Nilaini khan Fisheries Conference Hall, Directorate of Fisheries, MINECO-ah kum thar atana inhlan tharna hun hmangin Fisheries Minister Lalthansanga’n a hmanpui.
Minister chuan department-in Mizoram sorkar hnuaiah hmasawnna hrang hrang an nei chu lawmawm a tih thu sawiin department-a thawktute chu tunlai thiamna thar hmang tangkai thiam tura intuaihriam turin leh an thiamna tipung tura inzir chhunzawm zel turin a fuih a. Sanghaah Mizoram chu a intodelh theih nan tan la zual sauh sauh turin a fuih bawk.
Inkhawma Er. Lalrothanga, Secretary, Fisheries Department-in a department hmalakna zirchianna leh hmachhawpte sawi zauin tun dinhmunah sangha dil hmanga eizawngtu farmer 22,661 awmin, sangha dil 3,207, hectare 6,000 vela zau a awm mek a. Kum 2024 atanga 2025 chhungin sangha metric ton 7,177 thar chhuah a nih thu a sawi.
He hunah hian Fisheries Department Director Zonuntluangi pawhin Mizorama fisheries din chhoh a nih dan a sawi bawk.