Aizawl: Kohima Press Club kum 25 tlin denchhena buatsaih, hmarchhak state chanchinbumite inkhawmpui (NE Media Conclave) chu January 20, 2026 khan Kohima Capital Convention Centre-ah neih niin Mizoram atangin Mizoram Journalist Association (MJA) member pahnih an tel.
Inkhawmah hian thupui atan ‘Reimagining Truth: Northeast Journalism for a Changing World’ hman a ni a. MJA aiawhin Vanlalrema Vantawl, Editor, Zalen leh Andrew Lalremsanga, DD News te an tel.
Conclave pual hian panel discussion neih niin ‘Journalism as peace work: Navigating divides, building bridges & a strong media ecosystem for Northeast’ tih sawi ho a ni a; Vanlalrema Vantawl chuan speaker zinga mi a nih angin thu sawiin Mizoram ram buai laiin peace journalism chu lo awm tawh ni se Mizoram chu kum 20 chhung a buai kher a rin loh thu a sawi.
Kum 2021-ah Assam leh Mizoram police inkah tum pawhin national media tam takin tan bik nei lovin reporting an pek tlangpui tawh thu a sawi a a. “Peace journalism chuan buaina chhuak chu a thup kher a ngai lo a, boruak tisosang zawngin a ziaktuin a ziah loh erawh a mawhphurhna niin media ethics pawimawh tak a ni a. Mizoramah chuan a tul dan azirin a pawl angin MJA chu an che chhuak thin,” a ti.
Kum 2021 atangin Mizoramin raltlan mi sing tel dawngsawnga enkawl leh chhawmdawl kawngah sorkar bakah tlawmngai pawl hrang hrangte leh kohhranten hna an thawh thatzia sawiin mipuiten raltlan dinhmun an hriatthiam theihna tura media-ten uar taka an chhuah a dante a sawifiah.
Tunlai media tana chona lian tak chu raltlante leh Mizo mipuite inkarah boruak tha lo a awm lohna tura thu ziah thiam a tul thute a sawi tel bawk a. Mizorama media mite, a bikin new media luhchilhte chuan peace journalism-ah training, workshop leh mentoring an mamawh thu a sawi bawk.
Hmarchhak State Media Conclave-ah hian chanchinbu mi 100 vel an kalkhawm a, hlut hle a hlawh hle a ni.
Hawnna inkhawmah Khual Zahawm leh Press Club of India-a hmeichhe president hmasa ber ni mek, Sangeeta Barooah Pisharoty bakah Kohima Press Club President Alice Yhoshu-te thu an sawi a. Nagaland Chief Minister Dr Neiphu Rio chuan a tawpna hun a kharpui bawk.