Aizawl: Mizoram Police chuan nimin khan an din champha, Raising Day vawi 54-na chu GS Arya Mess, Police Headquaters, Aizawl-ah an lawm.
Mizoram Police din champha hi hmun hrang hrangah hman a ni a. He ni hi Mizoram Police-ten ram leh Mizo mipuite tana an inpekna thuk tak te, an hun leh nite thahnemngai taka ram tana an hlannate hriat rengna atan hman thin a niin an zinga hnathawk tha leh chawimawi phute chawimawina leh lawmman hlanna hun hman nghal a ni.
Aizawla lawmna hmanpuitu, Mizoram DGP Sharad Agarwal chuan Mizoram Police chu a tirah tlawm têa bul tan ni mah se tunah chuan thununna tha taka thuam, ram pum leh mipuite innghahna an lo ni ta chu ropui a tih thu a sawi a. Kum 1972 ata tawh vawiin thlenga Mizoram boruak inlumlet chhovah ralmuanna thlentu an ni tih a sawi a. Mizoram Police din chamah chuan an mite boral tate zahna an hlanin theihtawp chhuaha lo thawk tawhte pawh zahna an hlan tih a sawi.
Inkhawmah hian lawmman leh chawimawina sem a ni a. DGP’s Cash Reward for Bravery chu Lalremsanga, Driver Grade – II leh Constable T. Lalhruaitluanga, Saitual DEF hnenah hlan a ni a. Kendriya Grihmantri Dakshata Padak 2025 huanga Intelligence Category-ah Inspector Lalchhuanmawia, CID (SB) leh Head Constable C. Lalfakzuala, CID (SB) te hnenah hlan a ni a. Investigation Category-ah Sub-Inspector Samuel Lalramenkima, Mamit DEF hnenah hlan a ni a. Gallant Warriors Award 2024-2025 chu Sub-Inspector J. Lalnghinglova, 1st Battalion, MAP, leh Constable C/627 Lalkhawngaiha, 1st Battalion, MAP hnenah hlan a ni a. DGP’s Commendation Disc & Certificate 2025 chu Victor Zothansanga, MPS, ASP, Champhai DEF leh Alan Hmangaihsanga, MPS, DSP (Hqrs.), Champhai DEF te hnenah hlan a ni. Best Police Station of Mizoram 2025 chawimawina chu Vaivakawn Police Station hnenah hlan a ni.