Chelsea chu Premier League club zingah player chher chhuak tha berah an puang a. Club hrang hrangin rawlthar an chher chhohho hlawhtlin zui dan atangin tehfung an siam a ni.
Academy naupang an hrual chhohte chu Chelsea hian first team-ah an chhawr zui thin a, hlawhtling zui sawi tur an awm teuh tawh.
Hei hi CIES Football Observatory chuan an tehfung lian ber a nih avangin Premier League club zingah Blues hi an chungnung ta ber a ni.
Football khelh zir chho, kum 15 an nih atanga kum 21 an tlin thlenga club pangngaia season thum chhung awm chin chu he mi huangah hian an chhiar tel a. Chelsea hnuaia inzir 25 zet chu tunah hian Europe khawmualpuia league lian pangaah an khel mek a, hei vang hian English club zingah chuan player chher chhuak tha ber an tih phah a ni.
Heng player 25-te hian 2025-26 chhungin khelmualah minute 17,723 zet hun an hmang a, an zinga pali phei chu Chelsea first team-a tel pha an ni nghe nghe a. First team-a hmun changte hi Reece James, Trevoh Chalobah, Josh Acheampong leh Tyrique George te an ni a. An pali hian Under-8 atanga Chelsea player lo ni ngar ngar tawh an ni hlawm.
Levi Colwill pawh tel thei ve tur niin, tel se Chelsea player 26 an lang thei tur a nih laiin, a inhliam nat deuh avangin tun season chhung chuan Premier League squad-ah a tel ta lo a, hei vang hian chhiar tel a ni ta lo.
Barcelona player 40 an lang a, hei vang hian a pum puiah chuan pakhatna an ni a. La Masia atanga inzir chhuak 40 zinga 10-te chu first team-a tel mek an awm a ni.
An hmelma kumhlun, Real Madrid player 35 an lang a, pahnihna dinhmun an luah thei a. Pathumnaah Champions League nomawi kawl mektu, Paris Saint-Germain awmin French champion player 31 an lang bawk a ni.
Stade Rennais chuan player 29 an nei a, palina niin Ajax pawhin player 27 an nei a, pangana niin, Chelsea chu a pum puiah hian parukna an ni a. Ajax player 27 zingah hian first team-a lang pha an awm miah lo a ni.
Real Sociedad chu pasarihnaah an awm a, Manchester United chu pariatna niin Manchester City leh Arsenal te chu Top 10-ah an lang pha chiah bawk.
Manchester United, Manchester City leh Arsenal player chher chhuah 22-te chuan Europe khawmualpuia league lian pangaah an khel mek a ni.
Manchester City chher chhuah paruk chu first team-ah an khel mek a, Phil Foden leh Nico O’Reilly te pawh an tel a. Manchester United player chher chhuah panga chu first team-ah awmin Kobbie Mainoo pawh a tel a. Arsenal player chher chhuah pali chu first team-ah an awm a, Bukayo Saka chu a langsar pawl a ni.
Manchester City chher chhuah, Cole Palmer chu Stamford Bridge-ah a awm daih ve thung.
Liverpool chu Senegal club, AS Generation Foot aiin hmun khatin an hniam a, an chher chhuah zingah Premier League player pahnih, Pape Matar Sarr leh Ismaila Sarr bakah Al-Nassr forward Sadio Mane te an tel a ni.
Lyon, Toulouse, Le Havre, Athletic Bilbao, Valencia, Villarreal leh Espanyol te chu a dawttute niin Tottenham Hotspur chu an lang pha ve lo a. Juventus player chher chhuah 17 chu European league lian pangaah an khel mek a, Inter Milan, Bayern Munich, Borussia Dortmund leh Benfica player 16-te pawhin an khel mek bawk.
River Plate chu European club ni lo zingah hlawhtling bera puan an ni a, an chher chhuah 12-te chu Premier League, LaLiga, Ligue 1, Serie A leh Bundesliga velah an awm hnem hle.
Real Sociedad chuan an chher chhuah 15 an la chhawr zui a, Athletic Bilbao pawhin an chher chhuah 12 an chhawr zui bawk a, anni hi mahni chher chhuah chhawr hnem zual pahnih an ni.