Russian-ten van sang atanga Ukraine an beihna nasa tak avangin Kyiv-a chenna zahve chuan thlasik khaw vawt takah intihlumna leh power an nei lo va, khaw vawh lam hi -10°C a tling.
Drone, ballistic leh cruise missile hmangin ram lailia Kyiv, Dnipro leh chhim lama Odesa telin Ukraine hmun hrang hrang kah a ni.
Thawhtanni zan zankhua deuhthaw khan air raid siren a ri a. Thawhlehni khan Russian drone leh cruise missile-ten khawpui ber an kah leh avangin tihrik leh a ni bawk.
President Volodymyr Zelensky-a chuan ‘eng emaw zat’ lo kah thlak a ni tih a sawi a; mahse, tam takin an tum an fuh.
Thawhtanni leh Thawhlehni khan mi pali vel thiin mi 33-in hliam an tuar bawk.
Thawhlehni tukah khan Kyiv-a mi chenna in (residential building) 5,600 chuan intihlumna tur an nei lo va. Khawpui hmun tam zawkin tui an nei lo bawk.
Mayor Vitalii Klitschko-a chuan heng building zinga 80% hi January 9-a beihna an tawh avanga intihlum chhiate siam that hlim hlawt a nih thu a sawi a. Kha beihna an tawh atang khan technician-ten electricity leh gas pekna an siam hna an thawk ngar ngar niin a sawi.
Ukrainian president hi Thawhlehni khan Davos, Switzerland-a World Economic Forum-a tel tura zin tur a ni a; mahse, beihna an tawh nasat avangin Kyiv-a awm a thlang.
Davos-ah hian US nen lehkha tihfel ngai leh an ram himna tura ruahmanna rintlak tawk ziah tur a awm chauhvin a kal dawn tih a sawi.
Ukraine-ah hian kum a thar hnuah khaw vawh lam hi tui khang theihna khawp a ni reng a. Chanchinbute chuan radiator-te pawh a chhunga tui awm a khang avangin a puak a, building-ah tui a luh nasat phah a, intihlum nan in chhunga mei chhem pawh an tam phah niin an tar lang.
Power a awm loh avangin Kyiv-a chengte hian portable stove hmangin rawng an bawl a, chhungkaw tam takin generator an lei phah a; mahse, sum dinhmun inan loh avangin lei thei lo an awm teuh.
Kyiv thuneitute chuan Thawhtanni zan khan naupang 800 dawn telin, mi 10,000 chuang chu metro station-ah an him nan an tawm niin an sawi.
In sangte chu drone-in a fuh thin a, tawm nan a him loh avangin mi tam tak chuan metro system hi an him theihna awm chhunah an ngai a ni.