- Lalremliana Pachuau
Tihdam rawngbawlna leh mi mangangte’n Pathian mite an pan chhan tam ber chu, an harsatna leh manganna, natna laka fihlimna atân a ni ber. Tihdam rawngbawlna a hlung viau chhante hi eng dang a ni lo, miin thil mak an hmuh châk vang a ni mai mai. Crusade-a vawi hnih khat inkhawm atanga Pathian pâwlna, a tihdamna chan mai tum, kâr khat emaw a aia rei emaw inkhunga Pathian thu ngaihthlak erawh peih miah lo hi a tam zawk nihna a ni tlat.
Zoram kristian inti tam takte hian, Lal Isua hi an ring lo a ni miah lo. Natna ti damtu, chhandamtu, malsawmtu a ni tih an hre lutuk. Mahse, a laka an beisei bera hi anmahni tâna hlawkna, hamthatna, malsawmna lam hawi chauh niin, an natna, manganna, rilru hahna chhawktu atân bak Lal Isua hi an duh tak tak lo. Ama tâna nuna ama inserh hran lamah, kan hnufualin kan chaurau em em si a nih hi. Nachhawkna chak tak anga Lal Isua hman tum kan tam tial tial a, Pathian thu ngainaa Pathian thu anga nung, Pathian thu awih kan tlem tulh tulh a nih hi.
Johana 6:2 – Tin, dam lote chunga chhinchhiahna a tihte chu an hmuh avangin, mipui tam takin amah an zui a, tih thua Israel mipuite zia ang chiah hi kan nihna a ni. Mahse, Lal Isua’n heng mite hi a lawm hauh si lo. Johana 6:27 kan en chuan – Chaw dangral mai umin phe phe suh u, chatuana nun thlenga awm reng tur chaw, Mihring Fapain a pêk tur che u chu, umin phe zawk rawh u, tiin a zilhhau hrep a ni zawk.
Tihdam rawngbawlna chhimtu tam zawkte hi, Pathianin a ti dam ve mial mahna tih beiseina te, Israel fate’n Lal Isua thil mak tih an hmuh châk avanga amah an pan ang te, eng emaw chan ve mial an inbeisei avang tea kal an ni thin. Thu an ngaihthlakin an nunah danglamna a thlentirna turin, an thlarau nun an sawizawi zui peih leh chuang lo. Heng mite hi Lal Isua’n an nihna leh an duh a hai lo, chuvang tak chuan chaw dângral umtute tiin a chhuahchhal ta a nih kha.
Pathian thu ngaithlaa chhiar melh melh peih miah lo, inkhawm pawh peih em em chuang lo, tawngtai ve zeuh zeuh chunga kan thinlung nâ leh rum chhawkna tura Lal Isua zawngtu mai, tisa damna thlahleltute hi, an zawn ber Lal Isua hian a zilh nâ hle. Thu hriltu leh rawngbawltu tha tak tak kan nei chung si hian, Zoram Kristian tam zawkte nun hi thlarauah a thang lian mawh hle a nih hi.
Kristian tam zawkte hi, Pathian thu hian min ei ral thei hlek lo a. Kan thu ngaihthlak tam ber hi, mahni nuna seng luta a taka nunpui tum lem lo kan tam hle. Mahse, chu taka chu Lal Isua’n chaw tak a tih chu a ni lawi si. Rawngbawltu a zira Pathian inkhawmna hmun pan ta mai mai lah, veng tinah kan tam em em a.
Pathian thua inchiah ral ai chuan, thilmak leh huau huau lawm Kristian kan tam zawk a. Tawngtaia fianrial nun aiin huhova Pathian pawl tum, Thlarau Thianghlim chenchilhna chan tum kan ni fur a nih hi. Ziaktu pakhat chuan, ‘Kristianna hian kum 100 a tlin chuan, hma lam pana ke a pen loh vek chuan, nasa takin a hnungtawlh ngei ngei’ a lo tih hi kan ram Kristianna dinhmun dik tak a lo ni e.
Eng atân nge Lal Isua i tih ve le?