Aizawl: Mizo Language Development Board (MLDB) hnuaia din, Eight Schedules Study Group chuan Eight Schedule-a Mizo tawng dah turin dil thar lehna theh luha chak taka bawhzui thaa an ngaih thu Chief Minister Lalduhoma hnena an thlen.
Ningani khan chief minister chuan a pisaah study group hi kawmin an hmalaknate a thlirpui a. Hetih lai hian study group hian report an la thehlut chiah lo va, thehluh theihin an peih thawkhat tawh a ni.
Chief minister chuan hun reilo te chhunga hmalakna tha tak an lo kalpui avangin MLDB chungah lawmthu a sawi a. A umzui zel dan tur an rawtnate pawh tha a tih thu sawiin bawhzui a nih tur thu a lo hrilh.
An inkawmnaah hian Eight Schedules Study Group hian Mizorama pawl leh hnam pual hrang hrangte kawm kualin Eight Schedules-a Mizo tawng thun chungchanga an ngaihdante an zawh kual zawng zawngten dah chu tha an ti tlang hle tih an sawi.
Mizoram hian tun hmain dilna a lo thehlut tawh tih an sawi a, umzuina engmah a awm lo thung a. Study Group hian task group dina dilna hi a thara thehluha chak taka bawhzui thaa an ngaihthu chief minister hnenah an thlen a ni.
An inkawmnaah hian MLDB atang hian Chairman R. Lallianzuala leh Secretary Lalsangpuia bakah 8th Schedules Study Group member pahnih, Dr. Zoramdinthara leh Dr. H. Laldinmawia-te an tel a ni.
- Mizo tawng chungchang
Mizo tawng hi kum 1974 kha state official language-a puan a ni tawh a, khawvel ram hrang hranga awm Zo hnahthlak zawng zawngte inbiakpawhna a ni a, Sahitya Academy chuan regional language-ah a pawm a, zirna lamah PhD thlenga zir theih a ni.
Peoples Linguistic Survey of India chuan Mizo tawng chu tawng thang chho mek a nih thu a sawi.
UNESCO chuan khawvela tawng him a thliar hran zingah a him ber dawttu, ‘Vulnerable’ huangah a dah a, census hnuhnung ber, 2011 data-in a tar lan danin India ram state 26-ah leh UT pasarihah Mizo tawng hmang an cheng a, chhiarpui tharah chuan state zawng zawng a huam tawh ngei rin a ni.
Mizorama Mizo tawng hmangtu zat hi 2011 chhiarpuiah mi 8,30,846 an ni a, chhiarpui tharah nasa taka a pun rin a ni a. Zirtu thenkhat chuan tunah hian khawvel pumah Mizo tawng hmangtu hi nuai 22 chuang an awm tawh niin an ngai.
Google translate chuan May 11, 2022 atang khan Mizo tawng chu tawng danga lehlin theihin a dah tan a. Hemi tum hian Google hian khawvela tawng chi hrang 1,745 an zirchian zingah tawng 24 chu google translate-a dah turin an thlang a. Mizo tawng hi a tel pha a ni.