Hnam hnih intihbuaina awm mekna hmun, Manipur-ah Meitei mi pakhat chu Kuki hel nia rinten an ruk bo hnuah Churachandpur district-ah thah a ni a, boruak a tan thar leh phah mek.
Mayanglambam Rishikanta Singh-a hi Nilaini khan an chenna in, Tuibong atanga hruai chhuah a ni a, Natjang khuaah kah hlum niin police-in an sawi.
A hruai chhuaktute hi sorkar laipui leh Manipur sorkar nena inkap lo tura inremna, Suspension of Operations ziaha tel ve lo, United Kuki National Army nia hriat an ni.
SoO hinremna hi sorkar laipui, Manipur sorkar leh Kuki-Zo hel pawl eng emaw zatin an ziah a ni.
Singh-a hi Kakching Khunou, Kakching district mi niin Churachandpur-ah hian Chingnu Haokip nen inneiin a tribal hmingah Ginminthang tih a hmang a. Thawhtanni khan Nepal atangin Churachandpur-ah hian a haw chiah niin tual chhung mite chuan an sawi.
Tual chhunga pawl thenkhat chuan a nupui, Kuki nen hian helaia chen hi phalsak an ni tih an sawi.
Kuki leh Meitei hi May, 2023-a an inkara buaina a chhuah hnuah khan hmun dangah chuan an inchen pawlh lovin an inhal hle a, buainaah khan mi 260 vel thi awmin mi sang tel an in leh lo tlanchhiatsan an awm bawk.
Helho hian an nupain an hruai chhuak a, Natjang an panpui a, hetah hian a mipa zawk hi kah hlum a ni ta niin police chuan an sawi a. A nupui zawk erawh an chhuah thung a ni.
Video darh pakhatah chuan Singh-a hian a mantute hnenah hian a nunna ziahsak turin kutsuihin a dil lai a lang a; mahse, kah hlum a ni ta tho a ni.
Police chuan kohna an dawn hnuah a ruang hi Natjang-ah hian an hmu a, district hospital-a ruang dahnaah Ningani zing dar 01.30 velah an dah lut.
A titute hi tute nge hriat ni chiah lo mah se thubuai an ziak lut a, man tumin hma an la zui nghal mek bawk.