- Lalhruaitluanga Chawngte
Ni a kiam, hun a liam. Kan vei vel mai mai chhungin kum a vei – kum sul a vei! Rilru puitling thei lo mah se taksa erawh a puitling telh telh. Kan upa telh telh a, kum hi rei lo ka ti telh telh.
Thlasik thuam kan hlip chauh emaw tih laiin thla a lo sik leh der tawh a, kum tawpa lo thleng chauh tur emaw kan tih Krismas meuh pawh kan inrin hman hmain a lo liam leh hman der tawh! Kumthar a la awm alawm tia kan inhnem laiin kum hlui a liam a, kum a lo thar leh ta der mai!
Hun a liam a, khawvel pawh a lo danglam, mihring pawh kan lo danglam. Nang leh kei hi hun liam rual hian kan danglam a, kan upa sawt a ni mai lo, kan hmelah te, kan vunah te, kan taksaah te hun sulhnu chu chiang takin a lang. Kan rilru te pawh a inthlak a, kan tha tih leh ngainat zawngte pawh a inlet thawk thawk a, mawi kan tih zawng te, kan ngaihdan leh ngaihsan te pawh a inthlak nasat hi! Chutiang karah chuan Pathian erawh a ngai reng a, a va lawmawm tak – a danglam ve ngai lo!
Kumtluang parin kumtluang a daih lo a, tuktinpar meuh pawhin par loh tuk a nei. Pathian erawh hmasang atangin a la ngai reng a, kum hi vawi sang tam pawh thar se a ngai reng ang. Nikuma Pathian kha kum tharah pawh Pathian a la ni reng a, a la danglam ngai lo.
Pathian hi danglam ve thin se chu, ‘A ngaihdan a thlak a, kan lo hre si lo a,’ te kan ti ang a, ‘Tun hma khan hetiang hi a duh dan kha a ni thin a, mahse hei, a lo duh ta der lo mai,’ tia inrawn khawm chuk chuk a ngaih chang te, ‘A, a upa ve tawh a, a haihawt ve ta khawp mai,’ tia kan buai chang te, ‘A upa ve ta deuh a ni, min hriat pawlh tlat mai… kan dilna a hriat pawlh zawk nge ka hre lo,’ tia kan mangan chang te a awm ang. Nang leh kei anga danglam thin a ni lo hi kan vannei a, danglam ngai lo Pathian a nih avang hian lawmthu sawi tur kan ni.
Zu leh drug bawiha tang, mi thenkhatin rock music tawpzia sawi nana an hman thin Alice Cooper-a kha hun engemaw chen chu a hiar thei ang berin a tal ve a nih kha. Mahse Tuipui Sen tichattu khan zu leh drug ngawl veina lak atangin a chhanchhuak asin! Pathian chuan Tuipui sen pawh a tichat thei a, universe pawh a siam thei a, chuti a nih chuan he ngawlveina hi mihring lak atangin a paih daih thei chiang a ni, a tih kha. Tuipui Sen tichat theitu khan Alice Cooper-a leh ruihhlo inzawmna a tichat thei chiang khawp mai – a lo la danglam lo chiang khawp mai.
He kum tharah hian Adama leh Evi nena leng dun thin, a thu an awih loh hnu pawha an saruak khuhna tura savun kawrfual la ngaihtuahsak hramtu Pathian kha a la ngai reng a, Tuipui Sen tichattu Pathian kha a la danglam lo e. Nang leh kei kan danglam a nih pawhin tlangte pian hma, leilung din hmaa Pathian kha Pathian a la ni reng asin! Lawm rawh.
Kum thar chibai u.