Mizoram hi tlangram a ni a, a mi chengte pawh hi kuthnathawka eizawng kan tam hle. Eizawnna avangin tlangram lo neih chu kan rin pui ber a ni reng thin a, zawi zawiin kan kalsan chho tan hret hret thung.
Hetih lai hian mihring kan pung zel a, kan hmunhma neihin min zo lo tial tial a, tlangram lo neih pawhin awmzia a nei lo chho tial tial bawk. Kumkhata mahni eikhawp thar lo kan awm tam ta hle a, eizawnna kawng hrang hrang nei hlawm thin mah ila, kan zavaia inlungrualna tur hi kan nei thei meuh rih lo a ni.
Hetiang hi kan dinhmun a nih avang hian sorkar hian a mipuite hi min ngaihsak kan ngai zual hle a, sorkar hna a vang telh telh a, hna lak theih a tlem chho zel bawk nen, kan eizawnna tur kawng hrang hrang hi sorkar hian min ngaihtuahpui kan ngai a ni.
Thalai tam zawkten sorkar hna chauh hi an zawng tawh lo a, eizawnna rintlak leh ngelnghet, mahni inchawmna tur an zawng ta fo a, heng mite puih leh thuam chak kawngah hian sorkar a inhuam zau a, a mit a men zau deuh zel pawh hi a va tul em.
A mi cheng tam zawkte hian kuthnathawh kan la bansan mai dawn lo tih a chiang reng a, kan eizawnna hrang hrang, kan thlai chin leh kan huan lo ram neih hmang hian kan dinchhuah theihna khawp sorkar hian min ngaihtuahpui zel thei se la, office a thu ringawt lo hian sorkar hotu lawkte hi an chet chhuah fo a tul hle.
Kan ram leilung hi a tha a, eng pawh ching ila malsawm kan lo ni fo tawh thin. Kan rama rorelna lekkawhtute hian heng hi hrerengin, kuthnathawka eizawng, nitin hnathawh ngei ngei ngaite thleng hian kan dinhmun min hriatsak se la, kawng dikah min hruai mawlh teh se.