Aizawl: Chief Minister Lalduhoma hovin Ningani khan CM Conference Hall-ah Thenzawl Peace City Master Plan huam chhung atanga AH & Vety hmunhma, Neihloh khaw thar tura sawn chungchang an sawiho.
Sorkar thuchhuahin a tar lan danin, Thenzawl Master Plan hi IPE Global ten an siam mek a, sorkar chuan Peace City behchhan hian SASCI atanga incentive Rs. vbc 150 hmuh tumin proposal an siam mek bawk a. Proposal hi Peace City laili ni zui tura ngaih tuna AH & Vety leh Fisheries Department hmunhma vel hi a ni.
Neihloh khua hi a awmna leilung a him loh avangin kum tam tak buaina an lo tawk tawh a. Khawtlang mipuiten an khaw ram chhungah vek insawn an dil angin sorkar chuan ruahmanna a siam a. Hmalakna pawh thui tak kalpui a ni tawh a ni. An khaw thar tur atanga hla vak lovah hian AH & Vety hmunhma hi sawn mai chi a ni ang em tih thu an sawiho a ni.
Sawihonaah hian UD&PA Minister K. Sapdanga, PWD Minister Vanlalhlana, AH & Vety Minister C. Lalsawivunga, Tourism Minister Lalnghinglova Hmar te an tel.