Indian forward Manisha Kalyan chuan Peru-a Primera Division Femenina club Alianza Lima a zawm a, India rama footballer zinga South America-a club zawm hmasa ber a ni.
Muggowal, Punjab chhuak, Kalyan hian kum 13 a nih atangin football a khel tan a. Infiamna lampang a ti nasa hrim hrim a, athletic leh basketball te pawh a tuipui hle a, heng avang hian a tlan chak a, thahrui a ngah phah bawk.
Kum 24 mi hian 2017-18 khan Sethu a zawm a, vawi thum khelhah goal hnih a thun a. Kum 2018 atanga 2022 chhung khan Gokulam Kerala-ah a khel a, vawi 24 inlanah goal 21 ngawt a thun thei.
Kum 2022 atanga 2024 chhungin Cyprus club Apollon a zawm a, vawi 36 khelin goal 14 a thun a. Kum 2024 atanga 2026 chhung atan Greece club PAOK a zawm leh a, hetah hian vawi 17 khelhah goal sarih a thun leh bawk.
India U-17 team leh U-18 team tan vawi li ve ve a khel hman a, goal khat ve ve a thun bawk a. U-19 tan vawi thum khelhah goal thum a thun a, India senior team tan vawi 48 khel tawhin goal 14 a thun tawh bawk.
Kalyan-i hi attacking midfielder niin winger ang pawha a khelh theih bakah number nine ang pawhin a awm thei a. Left wing-ah a khel hnem ber a, a chang chuan left-back ang pawhin an khelhtir thin.
2020–21 AIFF Women’s Emerging Footballer of the Year chawimawina leh 2022–23 AIFF Women’s Player of the Year chawimawina a lo dawng tawh a. Indian footballer zingah UEFA Women’s Champions League khel hmasa ber a ni.
Alianza Lima hi club naran an ni lo va, kum 2021 atang khan Primera Division Femenina nomawi pawh an lo la nual tawh a, Copa Libertadores Femenina nomawi lak tumin beihpui an thlak mek a ni.
Coach Jose Letelier chuan Kalyan-i khelh dan hi a duh viau a nih hmel a, left wing atangin lehlam pawl defender-te a pawt darh thei thin a, striker thachhangdawltu atan pawh a hmang duh niin an sawi bawk a ni.