Aizawl : Laos-a jail tang Mizo nula, Ellen Lalthlamuani, kum 40, Mission veng chu he thu buatsaih lai thleng hian biakpawh theih a la ni lo.
Thudawn danin, November ni 18, 2025 khan Lalchawimawii fanu Ellen Lalthlamuani hian Vietnam atanga Singapore pan tum anga hriat a ni a, hemi hnu hian India rama let leh tum niin an sawi. November ni 18, 2025 zing dar 7:30 vel khan a nu leh a u biak a tum a, mahse, phone call an la lo a. A nu te hian an hriat veleh biak let an tum a, mahse an be tlang thei ta lo a ni.
He thil thleng chungchangah hian thuneitute biakpawh nghal an niin, Mizo Diaspora Cell chuan hma la in Ministry of External Affairs-ah tanpui tura ngen a ni a. Vietnam chhuahsan tura hriat anih avangin sorkar thuneitute chuan Vietnam-ah hian eng emaw chen an zawng a, mahse hmuh a ni lo a. Diasporal Cell hian a theih ang anga chhui zui zelin Laos ramah a awm tih an hre ta a ni.
Ellen Lalthlamuani hi eng emaw chen zawn a nih hnuah Laos-ah hmuh a ni a, heroin vanga man a ni. Mahse, heroin a ken zat chiah hi hriat a la ni lo va. Ellen-i hi jail-ah tantir niin, ukil hmanga biakpawh leh a chanchin hriat tumin hmalak mek ni mah se, he thu buatsaih lai thleng hian biakpawh theih a la ni lo.