Khawvel thiamna leh hmasawnna sang zelah hian chanchinbumite pawhin nekchep leh neksawr kan phur ve ta fo a, sawichhiat leh tham loh thlengin kan tuar a, ram zau zawk thlir phei chuan nunna hial chan phah an awm ta nuk mai.
Mahse, khawvel hian a tak taka chanchinbu (print/visual media) a thawkte hi a dah hniam lo a, ram ropui kan tihte ngat phei hi chuan an dahsang chhoin, anmahni atanga inzirin, ram khalh ngil nan an la hmang fo thin. Darthlalanga hmanga mahni inenfiah ram an tam poh leh chumi ram chu ram nuam leh khawvel ngaihsan rawn an ni fo thin bawk.
Kan ram chhung zimteah pawh hian media khawvela thawkte hian sorkar hotu thenkhatte hnen atanga dah hniam kan tawk ve ta zeuh zeuh a, mahse lungawi taka palzam mai chang kan ngah ta. Chu chuan ngaia neihna leh palzamna nasa zual a thlen zawk emaw tih mai tura thil a thleng chho ta fo erawh a fuh lo viauin a hriat a, social media lawm ram leh hnam kan ni zui palh ang tih a hlauhawm hle.
Khawvel hian a tak taka chenchilh a hnathawkte nun a dah pawimawh a, a ngaihsak leh a ngaihpawimawh thar viau tawh rual hian, kan ramah erawh social media avanga kan nitin chanchinthar buaipuitute ngaihnep leh neksawrna a thleng chho a nih hlauh thung chuan kan hmabak chu a thim hlein a rinawm a, kan hnam hi kan dazat chho hle ang tih a hlauhawm hle.
Media mite pawimawhna hi hria ila, sawi sawi lova a taka che ngam leh dah pawimawh fotu sorkar leh a hnathawkte an tam poh leh kan ram hian thudik leh rintlak, mipuiteah a pe fo thin ang.