Aizawl: MNF party chuan Lengpui Airport bula ram hralh dana thil diklo lian ber thleng chu CBI chhuitir an phut.
Aizawl Press Club-a Inrinnia thu thar thehdarhtute an kawmnaah MNF party Treasurer Lalruatkima, ex-Minister chuan ZPM sorkarin Lengpui ram hralh chungchangah a hriatpui ngei tih sawiin, “FCAA hman an duh chhan pawh a chiang chho zel. CBI chhuitir an ngam ngei turah kan ngai a, an ngam lo a nih chuan mantang eitu zingah an tel ve a ni ang,” a ti.
Lalruatkima chuan, Indian Airforce hnena Lengpui ram hralh anih danah nasa taka dan bawhchhiatna a thleng tih sawiin, “Ram lak/hralh anih tur thu sorkarin dan ang taka hriattirna, Preliminary Notification a tih chhuah atanga ni 70 chhung lekin ram neitu dik tak pawh ni lo, a buaipuitute kutah cheng vbc. 188 zet pek chhuah vek hman a ni a, ram lak kalpui dan chak ber record a nih a rinawm,” a ti.
Lengpuia ram neitu mi pariat te hmingin ram leina man, Compensation chu siam a nih laiin, heng ram pariat te leikhawmtu nia insawi Rohmingliana hnenah Aizawl DC Office chuan July ni 25, 2025 leh August ni 26, 2025 te khan a vaiin Rs vbc 70 a pe chhuak a, a bak zawng Rs vbc. 117.90 zet chu ram neitu ni ve miah lo, a buaipuitu nia sawi, Henry Lalremsanga Hlawnmual hnenah July ni 25, 2025 khan pek vek a ni a. Compensation siamna hming tumtu, ram neitu dik tak mi pariat te chuan cheng khat mah an chang ve lo thung niin a sawi bawk.
MNF Publicity Board chairman ni bawk Lalruatkima chuan Chief Minister Lalduhoma kaihhruai ZPM sorkar chuan Indian Airforce hnena Lengpui Airport hralh chu an hna hmasa berah an nei tih sawiin, February ni 21, 2026 khan Assembly House-ah Airforce hnena ram hralh tak chungchang hi Chief Minister chuan a sawi chhuak a, file mu tawh sa reng chu ‘tih tawp a ni’ tiin ropui hmel takin a sawi a, hun reiloteah a ruka file chu ko kal lehin a hmanhmawh thei ang ber leh dan tam tak kal kan leh palzut chungin hma a lo la char char zawk tih a lo lang ta tih a sawi a. Assembly House-ah hmalakna tihtawp a nih thu a puan atanga thla thum pawh a ral hma, May ni 15, 2025-ah Lengpui ram, Indian Airforce te hnena hralh tura dan ang taka hmalakna hmasa ber, ‘Preliminary Notification’ chu Mizoram sorkar chuan a ti chhuak a. Aizawl DC office chu ram lak/hralh tur enfiah hna preliminary survey thawk nghal tur leh ni 15 chhunga land record te chingfel vek turin notification hmang hian Mizoram sorkar chuan a hriattir a. Hmanhmawh taka thil kalpui anih avangin RFCTLARR Act, 2013 hnuaia ram lak anih dawna tih hmasak ngei ngei ngai ‘Social Impact Assessment (SIA)’ pawh kal kan (exempt) a ni a, SIA kal kan phalna hi Land Revenue Minister B Lalchhanzova chuan May ni 15, 2025 ah tho khan a pawmpui niin a sawi.
“Preliminary Notification tih chhuah nghal rum rum a nih bakah, Preliminary Notification hi danin a phut anga puanzar a ni lo a, a ram neitu Lengpui khawtlang hruaitute hriattir an ni lo a, chanchinbu-ah chhuah a ni bawk lo a, sawisel duh neite tana ni 60 chhung hun hawn thin pawh ni 15 lekah pawh tawi a ni a, a ruk thei ang ber leh a rang thei ang berin dan tam tak kal kan leh palzut chungin, ZPM sorkar hian Indian Airforce kuta Lengpui ram hralh anih theihna tur hian hma a la a. Rs vbc 188 vel zet hu ram hralh buaipui hna hi ni 70 chung vel lekin, a bul atanga a tawp thlengin an zo fel vek a ni,” a ti.
Mizorama ram lei scam/scandal lian ber a lo thleng ta mai hi zahthlak an tih thu leh pawi an tih sawiin Lalruatkima chuan, “Hmanhmawh tak leh hnawhsarum taka hma lak a nih dan en hian sorkar thuneitu sang atanga nawrna a na hle tih a chiang a, CM leh sorkar thuneitute hi thuk takin an inrawlh ngei niin a lang. Assam Rifles Biak In hmun pawh party office atana it ngawih ngawihtute hi Party office leina sum tuak kawnga an thahnem ngaih zia mipui ten kan hre vek a, Airforce ram tur leinaah hian dik lo taka hlawkna teltu, mantang eitu zawng zawngte chhui chhuak vek a, dan anga hremna lek kawh anih ngeina turin CBI chhuitir kan phut tlat a ni,” a ti bawk.