Aizawl : MPCC President Lal Thanzara chuan Zoram mipuite hmakhua ngaiin ZPM-in BJP nena an thawhhona tinghet tak tak tawh turin thurawn a pe.
Aizawl District Congress Committee-in Thawhlehnia Lal Thanhawla Auditorium-ah ‘Aizawl City Area’s Block, Group, Uniot Joint Meeting’ an neih hmanpuitu MPCC President Lal Thanzara chuan, Pathianin Indian National Congress a pek chu lawmthu sawina tham a nih thu a sawi a. Khawvela Constitution ropui tak siam sakin sakhaw tin tan zalenna a pe a, Kristian tlemte te pawhin zalen takin Pathian rawng bawl thei mah se, tunah chuan nek chepa an awm chu vanduaithlak a tih thu a sawi.
Lal Thanzara chuan BJP, Bajrang Dal leh an thurualpui ten India ram atanga hian Kristiante nuaibo an tum tih hi khawvel hriat a ni tih sawiin, “MNF leh ZPM te hian an thlawp tlat hi a vanduai thlak hle, MNF leh ZPM kan ni lo ngawt pawh hi lawmna tham a ni a, Congress hi engti kawng zawng maha BJP note ni ve lo tur kan ni,” a ti.
MPCC President chuan tunah hian mipuite tan khawsak a harsa em em a, enchhin sorkar hian inthlan laiin BJP sum an hmang a, an tlin tawh hnuin ngaihdan dang an neih san leh si a, tunah hian pawisa rawn pe tuten Mizoram tan pawisa an rawn release tha duh lo ta tih sawiin, “Hei hi mipuiin kan tuar mek a. Chuvangin, mipuite harsatna hriain kan sorkar hian Pu Beichhua te hi dinhmun tha pe tawh se, central an au ei tawh mahna. Zoram mipuite hma khua ngaiin BJP nena an thawhhona hi ti nghet tak tak tawh turin ZPM sorkar hi thurawn kan pe a ni,” tiin a sawi bawk.
ADCC President Lalhmingthanga Pachuau kaihhruai inkhawmah hian MPCC Sr. Vice President Lalnunmawia Chuaungo leh MPCC Treasurer Dr. Lalmalsawma Nghaka te pawhin thu an sawi a. Inkhawmah hian resolution pasarih an pawm bawk.