School Education Minister Dr. Vanlalthlana chuan class X leh XII result buah zirlai titha zualte (top ten) leh zirlai pass te division leh letter hmuh dan tih lan a ni tawh dawn lo tih a sawi.
Thawhlehni khan a pisa-ah thu thar thehdarhtute kawmin School Education minister chuan, “Class X leh XII result buah hian school hming hnuaiah zirlai pass te hming leh roll number chiah tar lan a ni tawh dawn a. He kalphung thar hi CBSE, CISCE leh state tam takin an kalpui tawh a. Zirlai ten mark an hmuh dan kimchang chu MBSE website atangin an hmu thei vek a, merit certificate leh rank certificate chu MBSE in a diltute hnenah a pe chhuak thei reng dawn a ni,” a ti.
Mizorama academic calendar hman mek April to March chu kum 2027-28 atangin tih danglam a ni dawn tih sawiin Dr. Vanlalthlana chuan, “Class 1-10 te chu January atanga December an kal ang a, Class 10 exam erawh tuna neih ang (February) ah neih chhunzawm a ni ang a. Class 11 leh 12 academic calendar atan April-March hman chhunzawm a ni dawn a ni,” a ti.
Zawhbelhna chhangin Minister chuan academic calendar chungchangah hian ngaihdan/rawtna lut 231 zinga 213 in January to December hi an duh zawk a. Zirtirtu hrang hrangte pawhin an duh zawk niin a sawi bawk.
School a hmalakna tur hrang hrang a sawi zingah Minister chuan English medium school-ah zirlai tam tak ten in lama tawng (home language) thlauh thlaa sap tawng an hman nasat lutuk avangin Mizo tawng humhalh anih theih nan English medium school-ah home language day hman a ni dawn tih a sawi a. Home language hi class period kar laka chawlh awmah hman a ni dawn tih a sawi.
Hindi uar tum anih thu sawi bawkin, “Zirlai ten Hindi tawng an hman thiam zawk theih nan Hindi zirtirtute chu training mumal tak hmanga tih chak tum a ni a. Hindi zirtirtu Hindi tawng hmang hlei thei lo te phei chu a hrana training kal tura tih an ni ang. Mizorama cheng ten Hindi kan thiam loh em avangin state pawna kalin harsatna kan tawk thin a. School zawng zawngah Hindi speaking day hmang turin thuchhuah siam a ni dawn a ni,” a ti bawk.
Dr. Vanlalthlana chuan common uniform hmang zirna kalpui chu chhunzawm a ni dawn lo va, chutih rualin hmang chhunzawm duh an awm pawhin an thuneihna a ni tih a sawi a. School timing pawh zing dar 9-ah chhunzawm a ni dawn tih sawiin tih danglam ngai a awm chuan la sawiho leh theih a ni tih a sawi bawk.
Zawhna chhangin Higher & Technical Education Minister Dr. Vanlalthlana chuan, Mizoram State University chungchang chu Drafting Committee kutah awm mekin, Assembly Budget Session lo awm turah Mizoram State University Bill hi putluh a nih dawn leh dawn loh hriat a ni rih loh thu a sawi.