Aizawl: Mizoram CSR Cell, Planning & Programme Implementation leh UNDP India tangkawpin an siam, CSR diltu leh a petute inzawnna tur leh inthlunzawmna tur (CSR Matchmaking portal) Mizoram CSR Connect chu nimin khan Chief Minister Lalduhoma’n a hawng.
Aijal Club, McCabe Hall-a hawnna inkhawmah chief minister Lalduhoma chuan, Mizoram CSR Connect a puitlin theih nana thawktu UNDP India, Planning & Programme Implementation leh CSR Cell te chungah lawmthu a sawi a. Kum 2023-24 CSR data atanga a lan danin, Mizoram chuan India rama CSR hman chhuah zawng zawng 0.06% chauh a hmu a. CSR hmangin hmasawnna hna lian leh tangkai tak tak a thawh theih avangin kum 2024 June thla khan Chief Minister Office-ah CSR Cell an din ta tih a sawi a. An hmalakna zarah a petute leh a diltute inzawnna Matchmaking Portal – Mizoram CSR Connect hi an lo hawng thei ta a. He portal hian CSR lamah awlsamna tam tak a thlen an beisei a, a petute tan pawha langtlang taka CSR kalpui a nihzia hriatna a ni dawn tih a sawi.
Chief Minister chuan Mizoram chu state ralmuang, eirukna tlemna, ziak leh chhiar thiam tamna, khuarei daih hmasawnna SDG lama hma la tha, mipuiten tlawmngaihna rilru pua engkim an tihna ram a nih avangin Corporate-te tan CSR hmanga luan chhuahna hmun tha a ni a. Hmalakna tur remchang a tam hle bawk tih sawiin, CSR nei company leh an hnuaia Civil Society te chu Mizorama an CSR rawn hmang chhuak turin a sawmin, “An pawisa rawn sen ral tinrengte chu langtlang, awmze nei leh hlawk taka hman ni dawn tih kan tiam a ni,” a ti.
Inkhawmah hian Angela Lusigi, Resident Representative, UNDP India pawhin thu sawiin, Mizoramin hmalakna tha tak tak a neih avangin lawm thu a sawi a. Mizoram nena thawkho zel tura an inpeih reng tih a sawi a. CSR hmanga hmalaknate pawh a hlawhtlin theih nan data dik behchhana ruahmanna siam leh kalpui a pawimawh zel. Mizoram CSR Connect hian data rintlak hmanga hnathawk turin CSR petu leh a thawktute a tanpui nasa dawn tih a sawi bawk.