Aizawl: Mizoram Police chuan hun eng emaw chen a bo hnua December ni 13, 2025 tlai dar 5:25-a MZU campus-a a ruang hmuh, Marina Lalchhanchhuahi (26) d/o Joseph Malsawma (L), Tanhril thihnaah RL Peka (62) s/o RL Dama (L), Tanhril Vengpui chu pawikhawihtu leh mawhphurtu ber nia an hmuh chhuah thu an sawi.
Thawhlehnia Mizoram Police thuchhuahin a tar lan danin, Marina Lalchhanchhuahi chu December ni 1, 2025 chawhma dar 11:30 ah an chenna in atanga a chhuak chu chin hriat lohvin a bo a. A chhungte’n hmalaksak tura Police te an ngen angin Zonuam Police Outpost General Diary-ah mibo report ziahluh a ni a, December ni 4, 2025 leh December ni 12, 2025 chhung khan Police leh Tanhril khawtlangte nen tangkawpin theihtawp chhuaha zawn a ni.
December ni 13, 2025, tlai dar 5:25 khan Marina Lalchhanchhuahi ruang chu MZU Football Playground bulah hmuh niin, ruang hmuh a nih hian a lo tawih chhe tan tawh hle a. Forensic mithiam ten uluk takin ruang endik hna thawk nghalin, Marina Lalchhanchhuahi a nih ngei thu finfiah a. Ruang chu a chhiat tawh avangin leh pawn lam lang theiah hliam hnuhma engmah hmuh theih a nih loh avangin a thih chhan diktak hriat a ni lo.
Hnuchhui a nih lai hian, mi engemawzat thu zawhfiah an ni a. Enquiry atanga a lan danin, Marina Lalchhanchhuahi hian nau a pai mek thu hriat a ni a, amaherawhchu a fa paina erawh hriat a ni lo. Marina Lalchhanchhuahi hian pasal neih a tum thu leh a pasal tur chu pa upa lam, pensioner a nih thute thuhretu hnen atanga hriat a ni a. Marina-i’n he a pasal tura a sawi hi Tanhril veng khua leh tui diktak a nih loh thu pawh hriat a ni a. Hetiang mi rinhlelh Hetiang mi ni-a RL Peka chu December ni 16 khan Zonuam Police Outpost-a inlan tura koh a nih laiin an chenna in atanga a zuan thlak hnuah a thi zui a ni.
He thihna chungchanga hnuchhuina kal zelah, ruang chharna hmun atang hian Marina Lalchhanchhuahi nghawngruh ni ngei a rin leh a ha pariat leh thisen ni ngei a rinte chu hmuhchhuah a ni a. RL Peka motor, TATA Nexon (MZ-01S-4967) chhung hmun hrang hrangah thisen kai ni ngeia rin te endik a nih hnuah, Marina Lalchhanchhuahi thisen ngei a nih thu leh ruang chharna hmuna ha hmuhte pawh Marina-i ha ngei a nih thu finfiah a ni a. Hei bakah, RL Peka chu Marina-i thihna chungchanga inhnamhnawih ngei ni a rin a nih avangin an chenna in chu ‘Ground of belief’ siamin enfiah a ni bawk.
Police-ten RL Peka phone hman lai Redmi 8A pawh Forensic Science & Laboratory-a enfiah tura thawnin, Redmi 8A ah hian Marina Lalchhanchhuahi hming leh contact number chu hmuhchhuah a ni a. Marina-i be hnuhnung bertu chu RL Peka, Tanhril Vengpui a in sa mek leh Kolasib atanga lo pem mi in luah a khawsa mek a ni tih hriat a ni a. RL Peka phone-ah hian ‘Pregnancy Test Kit’ thlalak hmuh chhuah a ni bawk.
Marina Lalchhanchhuahi tualthihna chungchanga hnuchhuina kawng hrang hranga atanga lo lang chu RL Peka, Tanhril Vengpui, Aizawl chu pawikhawihtu leh mawhphurtu ber niin hmuhchhuah a nih thu Mizoram Police thuchhuah chuan a tar lang.