Chief Minister Lalduhoma’n Bana Kaih Venture Capital Fund hmangin thalai mahni kutkawih hmanga din tumte harsatna tawh thin chu sut kian a ni dawn tih a sawi.
Planning & Programme Implementation hnuaia Mizoram Startup Mission leh Department for Promotion of Industry & Internal Trade (DPIIT) bultumin National Startup Day Mizoram Edition lawmna, Aijal Club-a nimin khan buatsaih a ni a. Chief minister chuan Mizoram Bana Kaih Venture Capital Fund leh Startup Readiness Level of Mizoram a tlangzarh nghal.
Chief minister chuan kum tam tak chhung chu Mizoramah thiam thil leh ngaihtuahna tha tak tak nena sumdawnna bei an lo awm tawh thin mah se thlawpna leh puihna an hmuh that loh avangin an sumdawnna a thang thei lo va, an suangtuahna a tak ramah a chang thei lo thin chu Bana Kaih Venture Capital Fund hian chutianga harsatna an tawh thin chu a su kiang dawn tih a sawi.
Sum hi sumthlawnpek a ni lo va, thawhlawm a ni hek lo tih sawiin, “Rinna leh inrintawnna nena sum peipunna a ni,” a ti a. Entreprenuer hma hun êng nei leh thang zel tura theihna nei, eizawnna bultantute a pui dawn a, a bik takin heng sumdawnna kalphung tha, thang thei tur leh danglam ngaihtuah chhuak thei te, kut themthiamna lam hawi leh industry dina thilsiam chhuak duh te leh tunlai thiamnaa innghata eizawnna siam duh te a tinzawn dawn tih a sawi a. Pawisa hian sumdawnna a thantir thei a, inrintawkna hian hma lam pan turin a pui thung a. Chumi kawngah chuan an tlangzarh tak, Start Up Readiness Level of Mizoram a pawimawh a. Record vawnna a ni mai lo va, Mizorama entreprenuer-te leh eizawnna kawng danga hmalakna tur tar langtu pawimawh a ni tih a sawi.
Lalrinzuala, CEO, MSUM chuan Bana Kaih Venture Capital sawi fiahin Bana Kaih Venture Capital Fund target-ah Rs vbc 100 dah a ni a, sorkarin Bana Kaih atangin Rs. vbc 20 a pe (tiam) a. A dang chu kawng dang atanga hmuh tum a ni.
Education Minister Dr. Vanlalthlana, Commece & Indusries Minister F. Rodingliana leh LESDE Minister Lalnghinglova Hmar ten thu an sawi bawk.