Uefa Champions League league stage chu Nilaini zan khan khelh zawh a ni ta a, team 16-in knockout phase play-off draw an hmachhawn dawn a, Zirtawpni hian pawh a ni ang.
Knock-out playoff-a inhmachhawn turte hi Switzerland-ah India sanaa tlai dar 04:30-ah pawh tan a ni dawn a, league phase-a pakuana atanga 24-na inkara mite an inkhel dawn a ni.
League phase-a a sang pariatte chu round of 16 an tlang nghal a, heng zingah hian khelh tawp ber khelh hmain Arsenal leh Bayern Munich chu an tlang chiang tawh a, February-a inkhelh hah an ngai ve dawn lo tih a chiang tawh.
Play-off inkhel hmasa hi February 17/18-ah khelh a ni ang a, thawh hnihna hi a hnu chawlhkar khatah an khel ang.
Play-off-a inkhel tur hi league-a an dinhmun azirin a hril dawn a, Nilaini zana inkhel hnuhnung ber result-ah thui tak a la innghat.
Club inhmachhawn turte hi league phase-a an dinhmun azirin seeded leh unseeded pair-a siam vek a ni a. Pakuana atanga 16-na inkarte chu seeded pair niin 17-na leh 24-na inkara mite chu unseeded pair an ni.
Seeded pair-a mite hian unseeded pair-a mi zel an hmachhawn dawn a. Seeded pair-a hniam ber, 15-na leh 16-na chuan unseeded pair-a a sang ber pahnih, 17-na leh 18-na an tum thei dawn a ni.
Seeded team hi an zin chhuak hmasa ang a, an khelmualah second leg an thleng ve thung ang.
Play-off-ah hian Premier League team-te pawh inhmachhawn thei dinhmunah an ding mek a. Club dang thenkhat pawh league phase-a an hmachhawn tawh hmachhawn nawn leh thei an awm bawk.
Play-off paltlang team riat chuan league phase-a pakhatna atanga pariatna inkara awm, tlang chiang sate chu round of 16-ah an zui lut dawn a, a tlang chiang sate hi an hmachhawn zui dawn a ni.
Round of 16 atang hian vawi hnih khelh (mahni khelmual leh tumpuite khelmuala inkhelh)-a chak lo zawk an tla nghal dawn a. Final thleng chu vawi hnih khelh zel hi a ni tawh dawn a ni.
Play-off ang bawkin league phase atanga round of 16 lut tlang nghalte chu seeded team an ni nghal dawn a. Heng a sang pariat tlang sate hi an khelh zel turah anmahni mualah zel an khel hnuhnung thei dawn a ni.
Tun season hi league phase-a che tha team riatte quarter-final leh semi-final thlenga hamthatna nei thei tura seeded team-a dah an nih hmasak ber tum a ni dawn nghe nghe.
League phase-a pakhatna atanga palina inkarte hi quarter-final-ah seeded team an ni dawn a, quarter-final an lut a nih chuan anmahni mualah an inkhel hnuhnung thei dawn a ni.
League phase-a a chung ber leh a dawta awmte chu semi-final-ah seeded an ni zui dawn a, semi-final an lut a nih chuan anmahni khelmualah inkhel hnuhnung zawk thleng thei tura hamthatna pek an ni bawk.
Seeded team-te hian quarter emaw, semi-final emaw an lut ta lo a nih chuan anmahni pet thlatu team zel chuan an nihna chu an chang thei dawn a ni.
Knockout phase khelh hun tur:
Last 16: March 10-11 & March 17-18
Quarter-finals: April 7-8 & April 14-15
Semi-finals: April 28-29 & May 5-6
Final: May 30
Last 16, quarter-finals, semi-finals leh final-a inhmachhawn turte hi February 27-ah pawh a ni ang.