Aizawl: Zirlaite leh zirna in inkarah inelna thianghlim zawk a awm zel theihna turin HSLC leh HSSLC-ah Top-10 tar lan leh a nih ngei theih nan thuneitute ngun taka ngaihtuah nawn turin Mizo Zirlai Pawl (MZP)-in ngen.
Nilaini khan MZP General Headquarters Executive Committee Meeting vawi 649-na chu MZP Pisapuiah neih a ni. MZP President Dr C Lalremruata kaihhruai thutkhawmah hian Mizoram sorkarin HSLC leh HSSLC Top-10 te result bu-ah session thar 2026-2027 atanga tar lan a nih tawh loh tur thu a sawi chu an ngaihtuah a. Zirlaite leh zirna in inkarah inelna thianghlim zawk a awm zel theihna turin HSLC leh HSSLC-ah Top-10 tar lan leh anih ngei theih nan thuneitute ngun taka ngaihtuah nawn turin an ngen.
MZP chuan zirna in leh zirlaite inkarah thiamna tak tak a lanchhuah theihna turin result bua tar lan loh ngawt aiin, exam pattern leh question siam dan chu ngun taka ennawn zawk turin thuneitute an ngen.
Thutkhawmah hian Forest Conservation Amendment Act, 2023 (FCAA) chungchangah, Study Group zirchianna atanga sawiho a nih hnuin, he dan hi Mizoram leh hnam tana thalo leh Mizo hnam kal zel tur atana himlo a nih avangin MZP chuan tha a tilo a. Mizoram Assembly in he dan hman theiha a lo pass tawh chu sut leh ngei turin thuneitute a ngen bawk.
Tun hnaia Mizoram University Finance Officer lak chungchang pawh ngaihtuahin, Mizoram state a zirna in sang berah dan palzutna tam tak awma hnalak a ni chu hriatthiam har an tih thu an sawi a. Hetiang thil hi a thlen nawn tawh lohna tur leh MZU zahawmna humhim a nih theihna turin a tul angin hmalak an rel a. Hei bakah Mizoram-a Central Institution hrang hrangte chu dan dik taka hnalak kalpui thin turin a hriattir bawk.