- Rinfela Zadeng
Mizo hranglui zaithiam em em C. Vansanga hla sak pakhat ‘Kan damchhan’ tih Lalduhzuala phuahah khan heti hian kan hmu a –
Aw, engan nge maw khuanu hian,
Hringnun hi a lo duan le?
Thamral leh mai tur hian em ni le,
Duh vang reng in kan piang si lo.
Chhuan – generation – a lo inthlak a, kum 2000 hnulama piangte chuan Sap kan tih te aiin kan anpui Korean kan ngaisang zawk tawh a, kan duh zawng leh nih kan chak zawngte pawh a in ang lo ta nuai a nih hi. Mahni ram leh hnam zahpuia hnam changkang leh hausa zawk atanga lo piang chak kan awm ta a nih pawhin kan dem awm loh. A chhan chu kan pianna, kan nun bul tanna hi kan duhthlan a ni tlat lo a!
- A thimsa a pian
Chhungkaw rethei tak atanga han pian chhuah bik te, sawn han nih nghal bik tawp te, piangsual leh rualban lo tura han pianchhuah nghal bik tawp mai te hi – kan bul tanna atangin a hrehawm nghal ngawih ngawih bik mai a nih hi tir’u? Ngati nge Sapah ka lo pian loh? Ngati nge Korean ka lo nih loh? USA ah piang ila chuan Sap tawng ka thiam sa nghal dawn a, American Idol atangin ka lar chhuak thei asin le! London –ah lo piang ila chuan English Premier League –ah inkhelin Arsenal FC player pawimawh leh khawvel pum huap pawhin ka lar ve thei dawn asin le!
Ka nu leh pa an hmelchhiat avangin ka la hmelchhe zui a, ka piante a nalh loin ka va ti tengtung ve maw le? Ka lian loin police-ah pawh ka tling zo lo a, kan la rethei zui! Khawvel changkanna kan hre pha ve vek si a, IPhone ka awh teh lul nen IPhone chu sawi loh – Alu leina tur em pawh kan nei lo a nia! Ambani fa tal lo ni ila aw……
Awi! Ka mizia te hi ka duh loin ka tawng thei bawk si. Nula ve si ka aw te hi a thum mah mah a, ka tribal ngawih ngawih! Mipa thinchhe tak, rethei leh mi hmuhsit chhungkua atanga ka lo piang hi chu ka inchhirin ka lo piang ve hi ka tan chuan phurrit a va ni em! Vanduai tur renga lo piang em ni ka nih bik?
Chutiang ringawta kan nunna neih tanna, kan lo pianna kan thlir a nih chuan lungawina reng reng a awm lo ang. Kan awh ruk leh nih kan chak, kan pianna tura kan duh leh neih kan duh ang zawng zawng nei vek khawpa piang vannei pawh ni ila, kan nunna hlutna kan hriat loh chuan kan lungawi ngai reng reng lo ang.
- Pathian remruat
Jeremia 1:5 kan en chuan “Pum chhûnga ka siam hma chein ka hria che a, Chhûl ata i chhuah hma pawhin ka serh hrang tawh che,…” tiin Zawlnei Jeremia kha Pathianin a hresa tawh tih kan hmu a. Sam 139:4 kan chhiar chuan “I hnenah lawmthu ka hrilh ang che; hlauhawm leh mak taka siam ka ni si a..” tih kan hmu bawk.
Mihringte hi Pathian anpuia siam kan nih thu Bible-ah kan hmu a (Gen 1:26), Scientifically, Biologically leh Theologically –in i lo piangchhuak a. Chuvangin Pathian anpui nihna neiin i lo piang a. I mize tha lai leh tha lo lai te, i induhkawp lohna leh i inchhuan ruk ve deuhna lai te, engkim mai kha duh taka a neitu Pathianin amah anga a siam vek a ni a. Pathian nihna tam tak zinga a nihna pakhat nei i ni a, lo inzahpuiin lo insit tawh ngai suh.
Harsatna leh beidawnna thuk ber hmachhawn tura i lo piang a nih pawhin, a anpuia siamtu che leh a duhna taka dahtu che Pathian hian engtin nge hruai che a tum tih hi ngaichangin lo ring la, Pathianin nunna pe chea a piantir ve che avanga lawmthu sawi thei turin Pathian thuawihin lo nung tlat ang che.
Pathian hian chhan neiin duh taka a siam i ni a, i ta ni loin a ta ni tura piang i ni. Khawvela doctor thiam ber ber te pawhin an pek theih loh Pathian a pek che nunna neitu i ni a, i hlutzia hre reng rawh.