Aizawl: Ministry of Home Affairs (MHA) Office, Kartavya Bhavan, New Delhi-ah Nilaini khan union home secretary hovin MHA hotute leh Central YMA hruaitute an inkawm.
Thutkhawmah hian March 15, 2025-a union home minister-in Mizoram a tlawh tuma Central YMA leh NGO dangten an thu thlen bawhzui a nih dan hrang hrangte sawi lan a ni a. Chung zingah chuan – ruihhlo dona atana Central YMA hnena NCB kaltlanga motor leina tur sum Rs. 88,95,675 ruahman a nih tawh dan te, ruihhlo dona kawnga inzirtirnaa hmalakna tur Rs. vbc 2.3 ruahman a nih tawh thu te, Thingsulthliah ra YMA Conference Centre sakna tura Rs. vbc 99.7 dah a nih tawh thu te, 8th schedule a Mizo tawng dah a nih theihna tura ngenna chu diltu 150-200 vel an awm avanga committee dinin an ngaihtuah tur thu te sawi a ni a. Heng bakah hian Mizo thalaite tana Civil Service Coaching Centre buatsaih mek a nih thu leh AAI kuta Lengpui Airport hlan chungchanga thil awm dan te sawi a ni.
Hei bakah hian Indo-Myanmar Border Fencing chungchanga YMA ngaihdan zawh an nih angin YMA hruaitute chuan NGOCC thu ding lai angin ramri hung hian Zofate inunauna a tihchhiat theih dawn avanga hung rih loh an duh thu leh Mizoram State Assembly pawhin resolution a lo pass tawh a nih thu te, Indo-Bangladesh ramri hungah Mizoramin nasa taka ram a chân dan leh khaw eng emaw zat hung pawna a awm dante sawi lan a ni bawk.
Indo-Myanmar ramri hung turah hian survey neih mek a nih rualin ramri a cheng mipuiten ramri hungin a ken tel tur an hriat loh thu leh eng angin nge a nghawng dawn tih inhrilhfiahna a nih loh thu YMA hruaitute hian an sawi bawk.
Tunah hian Indo-Myanmar Border Fencing atan BRO-in survey an nei mek.
Thutkhawma tel tur hian MHA hian Central YMA Office Bearer pali sawm an nih angin President R. Lalngheta hovin Vice President Prof. Lalnuntluanga, Gen.Secretary Prof. Malsawmliana leh Treasurer Er. H. Duhkima te an kal.
Union home secretary hova thutkhawmah hian MHA official hrang hrang bakah IB hotute, Assam Rifles hotute leh BSF hotute bakah Mizoram Chief Secretary Khilli Ram Meena a tel.