Aizawl: Students’ Self Support Union (SSU) buatsaih, 39th General Assembly cum Ruby Jubilee lawmna Vana pa Hall-a neih chu Ningani khan Larsap General (Dr) Vijay Kumar Singh-a’n khuallian niin a hmanpui.
Larsap General (Dr) Singh chuan zirlai ni chunga mahni intodelh tum tlat SSU hmalakna chhuanawm tak chu mi dangte fuih phurtu a ni tih hriaa, theihtawp chhuaha chhunzawm zel turin a chah a. Tumruhna leh beih hram hramna tel lo chuan hmalam pan a harsa tih sawiin, SSU hmalakna chu zirlaite cho phurtu pawimawh tak a ni, a ti a. Zirna senso leh inelna sang chho mek zel karah SSU chuan kut hnathawh a zahpui lo tih sawiin, sum leh paia intodelh leh mahni kut kea din a ngaipawimawh a, hei hian zirna hi degree neih nan mai ni lo, mi puitling chherchhuah nana pawimawh a ni tih a entir chiang hle tih a sawi.
Larsap chuan SSU-in zirlai mahni intodelh tuma theihtawp chhuahte chawimawina hun a buatsaih thin chu fakawm a tih thu sawiin, “Mahni kutkawih hmanga intodelhte chu an nghetin an tlo a, inthununna an nei thain eng pawh hmachhawn dawn se an ngaihtuah awm lo nge nge thin a ni,” a ti a. Zirlaite chu an tumah dingnghet tlat tur leh dikna, khawngaihna, midangte zahna leh khawtlang rawngbawlna dah pawimawh tura chahin, “Hlawhtlinna tak tak chu mahni hlawhtlinnaah chauh ni lovin mi dang kan dawmkan dan thlengin teh a ni,” a ti bawk.
Larsap hian Ruby jubilee puala buatsaih lungphum a hawng nghal bawk.
He hunah hian kum 2026-2027 atana SSU Gen Hqrs. hruaitu thar thlanna neih nghal a ni.