Aizawl: Zo Re-unification Organisation (ZORO) buatsaih Chin-Lushai Conference vawi 134-na chu Ningani khan Lal Thanhawla Auditorium-ah neih a ni. He hun hi Assembly Speaker Lalbiakzama chuan khuallian niin a hmanpui.
Speaker Lalbiakzama chuan thu sawiin Zofate rorelna pakhat hnuaia an awm theihna tura ZORO-ten kum 1988 atanga an beihna chu ropui a tih thu leh ZORO bultumin December 14, 2024-a Zo Indigenous Identity Card chu amah ngeiin a lo tlangzarh tawh thu a sawi a. Tharum thawh lova an movement kalpui mek chu chhunzawm zel turin a chah.
Zofate awptu sap hovin Chin Lushai Conference, January 29, 1892-a Zofate rorelna pakhat hnuaia awmtir tura an lo rel tawh tihhlawhtlin a nih tak loh avanga ramri siam chawpin a daidan rei tawh avangin, Zofate zingah tawng, rilru sukthlek, hawi her, ngaihsan zawng chenin lo inang lo ta hret hret mah se thlah khat, unau chhul khat kual na na na chu, an danglam thui thei tak tak lo, speaker chuan a ti a. Zofate chu an awmna hmun apiangah inngeih taka nung ho a, tangkhawm tura chahin, “Rorelna pakhat hnuaiah awm thei rih lo mah se, thinlung hmunkhat puin an awm thei a ni,” a ti bawk.
Chin-Lushai Conference vawi 134-naah hian thupui atan ‘Inpumkhatna’ tih hman a ni a. Zing lam hun chu R. Sangkawia, President, ZORO chuan kaihruaiin, L. Ramdinliana Renthlei, Vice President-in ZORO hmalaknate a tar lang a. Dr. C. Lalremruata, President, MZP leh B. Lalkhawngaihzuala, President, MSU-ten thu an sawi bawk.
Chawhnu lamah thupui sawihona hun hman niin, Lalmuanpuia Punte, MLA & Adviser to CM-in a sawi hawng a ni.