Portugal hmar lamah Storm Kristin avangin mi pathum vel thi awmin mi 8,00,000 chuangin electricity an neih loh phah a. Thing a tlu a, in a chhia a, kawngpui leh rela inkalpawhna buai phahin Spain panin a kal zui.
Lisbon khawpui daia Vila Franca de Xira-ah thing tluin car a delah mi pakhat a thi niin emergency services-in an sawi a. Mi dang pahnih hi a tuar na ber zinga mi, ram lailia Leiria-a mi niin local council-in an sawi bawk.
Sorkar thuneitute chuan darkar khata km 150 thlenga chak thli, ruah tam tak leh vur tla nasa chu mi maktaduai 11 velin tuarin khuarel kaihhnawiha chhiatna 3,000 chuang a thleng niin an sawi.
Grid operator E-Redes chuan an technical team-te chu power supply ti tha leh tura thawkin Nilaini chawhnu khan maktaduai chanve vel an pe leh hman tih an sawi a, mi 8,55,000 vel erawhin electricity an la nei lo.
Portugal-a a thawh zawhah Kristin hian Spain khawchhak a pan leh a, anni hi Storm Joseph-in a nuai tawh, an buai la reh lo an ni a. Thawhlehni khan tuipui kama Torremolinos khuaah thli na takin palm kung tluin hmeichhe pakhat a delh hlum nghe nghe.
Nilaini tuk khan Spain-a kawngpui 160 chuang chu vur tla nasa avangin a buai a. Heng zingah hian Madrid panna, A-6 pawh a tel a. Madrid khawpui lailiah pawh in chungah vur a tla chhah khat vek a, harsatna erawh a thleng lo.
Spain-a national weather agency, AEMET chuan an ram chhung hmun thenkhatah thli a thawk thei tih an sawi lawk a. Almeria province chhim lamah chuan red alert an chhuah bawk.
Tual chhung thuneituten park an khar a, pawn lama infiamna leh thil zirna hmunte pawh khar a ni bawk.