Aizawl: Agriculture & Farmers Welfare Minister PC Vanlalruata’n kum 2026-27 budget-ah thlai thar leina tur an dah dawn tih a sawi.
Thawhtannia ZPM party-in an party pisa-a chhung inkhawmah Agriculture & Farmers Welfare Minister PC Vanlalruata chuan nikumah ZPM sorkarin thlai thar leina budget-ah a dah a, Handholding-ah an dah a, an ring nghal mai a. Mahse, House-ah, ‘Khaw nge thlai thar leina tur in dah chu?’ tiin an zawt a. Chumi a nih avang chuan chief minister-in ‘Lo dah tawh rawh u, a hranpain, Handholding-a dah loin, an hre thiam lo em mai,’ a ti tih sawiin, kum 2026-27 Budget-ah hian thlai thar leina tur an dah dawn tih a sawi.
Agriculture minister chuan nikumah India ramah sawhthing rate a chhe em em a, ngaihtuah phak lohin a chhia a ni. Kg-ah Rs. 13/14/15 te a ni chho a. A buyer an biakte pawh an lo kal lawk thei lo tih sawiin, “February 20-ah a rate a up loh chuan sorkarin kan la ang, kan ti a; sawhthing rate up loh karah sorkarin kuthnathawktu te hnenah kg-ah Rs. 50-in, mipui kan tiam angin kan la a ni,” a ti.
Hun a lo kal zel a, ‘Hetiang ringawt chuan kan tlin dawn lo. Eng pawh ni se, mipui kan tibeidawng ve tur a ni lo,’ an tih avangin support price nen an la zel tih sawiin PC Vanlalruata chuan, “Season tawp thlengin support price nen Kg-ah Rs. 50-in farmer-te hnenah pawisa a lut a ni. Kan vannei a, nikumah tun ang hunah hian sawhthing Kg-ah Rs. 10 -13 vel a ni a. Tunah chuan sorkarin a hun tiam a thlen hma pawh khan Kg-ah Rs. 30 ten an hralh a ni,” a ti.
PC Vanlalruata chuan Mizoram sawhthing quality thatna hi khawvelin a hre tan tawh tih sawiin, “Lo induh ve deuh kan duh a ni. Support Price Mode-in kan kal dawn a, kan sawthing chingtute pawhin Marketing Board-in ruahmanna kan siam hi lo zawm se, kan sorkar ruahmanna hi lo ngaihchang thiam se, Kg-ah Rs. 50 an inpteah a lut dawn,” tiin, Mizoram sawhthing quality tha hi khawvelah zawrh chhuah a nih dawn avangin lo nghak hram hram turin a ngen.
Hmuhphiah chungchang pawh sawiin agriculture minister chuan, nikumah hmunphiah a rate grading-a an tih chu mipuiin an thiam lo va, a leitu empanelled buyer-ten tih ngaihna an hriat loh avangn a tawpah sorkarin grade siam loin Kg-ah Rs. 80-in an la a. Mizoram hmunphiah a chuangbang zawng zawng a bo a bang awm loin sorkarin Kg-ah Rs. 80-in an lei fai vek tih a sawi a. Kuminah chuan a season tirah a lei hun tur an siam a, tunah hian an inkau vek tawh a. Collection Centre-ah Kg-a Rs. 80-a lei turin an inpeih vek tawh tih a sawi.