Hmarchhak huapa ju-jitsu inelna hmasa berah Mizo infiam mi panga kalte chuan gold medal paruk telin medal pakua an hawn a, hlawhtlinna ropui tak an chang.
Inrinni atanga Thawhtanni thlenga Guwahati, Assam-a 1st North East Ju-Jitsu Championship khelh zawh takah hian Ju-Jitsu Association of Mizoram (JAM) chuan Mizoram aiawh tura a tirh fighter pangate hian fighting style chi thum – Ne-Waza (Brazilian Jiu-Jitsu), Contact Fighting (MMA Rules) leh Fighting System (Semi Contact striking leh Grappling)-ah medal an la a ni.
Mizo fighter paliin gold medal an la a. HMS Dawngzuala, Dawrpui cuan kg 77 hnuai leh Lalhmangaihzuala, Republic Vengin kg 62 hnuaiah Ne Waza (BJJ) leh Contact Fighting (MMA)-ah gold ve ve an la.
Lalawmpuia, Lengpuiin kg 69 hnuaiah Ne Waza (BJJ)-ah gold la bawkin Contact Fighting (MMA)-ah bronze a la a. Lalchhuanawmin, Dawrpui Vengtharin kg 52 hnuaiah Fighting System (Semi-Contact)0ag gold leh Ne Waza (BJJ)-ah bronze a la bawk.
Francis Lalremruata, Republic Vengin Contact Fighting (MMA)-ah bronze a hawn bawk.
Mizo fighter-te hi JAM-in team entry fee, thlenna leh ei leh in a tumsak bakah SPES Martial Arts Academy-in an kal man a tumsak thung. Coach pakhat, Nazareth Lalthazuala, Zemabawk East-in a hruai a ni.
Ju-Jitsu hi khawvela martial arts thang chak berte zinga mi niin kum naupang atanga upa thlenga zir theih, mahni invenna atan leh MMA atana tangkai a ni a; ram thenkhatah phei chuan police leh sikul curriculum-ah zir ngei ngaiin an dah hial a ni.
Mizoramah pawh hruaitute thahnemngaihnain national leh regional tournament-ah aiawh an intir ziah a, sorkar laipuia sports ministry-in a pawmpui game a nih bakah Asian Games-ah pawh telh a ni.
India ramah hian BJJ black belt 10 tling lo hret chauh la awmin heng zinga pakhat hi Mizo a ni nghe nghe.
MIZORAM TEAM:
1) HMS Dawngzuala, Dawrpui
2) Lalawmpuia, Lengpui
3) Lalhmangaihzuala, Republic
4) Francis Lalremruata, Republic
5) Lalchhuanawmi, Dawrpui Vengthar
Coach: Nazareth Lalthazuala, Zemabawk East