National AIDS Control Organization (NACO) leh Mizoram State AIDS Control Society te bultumin North East Multi-Media Campaign (Red Fest) chu Mizoram chuan February 6, 2026-ah a thleng dawn a, he hunah hian hmarchhak state pariat atangin an kalkhawm dawn a, rimawi hmanga HIV/AIDS Awareness neih tum a ni.
Mizoram State AIDS Control Society hotute’n nimin khan Aizawl Press Club-ah thu thar thehdarhtute kawmin, Red Fest neih tur chungchang an sawi fiah a. Red Fest neih turah hian Arunachal Pradesh, Assam, Meghalaya, Manipur, Mizoram, Nagaland, Sikkim leh Tripura atangin Project Director leh State AIDS Control Society Officials te bakah NACO atangin Additional Secretary & Director General leh High Officials ten an rawn hmanpui dawn tih an sawi.
An sawi zel danin, he hunah hian thalaite hnenah HIV/AIDS darh zel tur laka invenna leh inzirtirna kalpui tum a ni a, state tin atangin zaithiam an fuankhawm dawn a, hmarchhak state hrang hrang te ziarang pho chhuah a ni dawn a. HIV/AIDS zirtirna tur stall te siam a ni dawn bawk.
‘North East Red Fest’ hian a tum ber chu thalaite hnenah HIV/AIDS chungchang zirtir a ni.