Chief Minister Lalduhoma’n Mizoram lei hnuaia oil leh gas zawn hna hi chak zawka kalpui a nih theih nan an bawhzui zel thu a sawi.
Indian Oil Company Limited-in kum tina an tih thin, hapta hnih chhung oil leh gas renchem inzirtirna, Saksham 2025-26 chu Thawhtanni khan MINECO Mizofed Petrol Pump-ah chief minister-in a hawng.
Hawnna inkhawmah oil leh gas lama Mizoram hmasawnna tura hmalakna thenkhat sawiin chief minister chuan, in chhunga hman chi gas hi Aizawlah pipeline connection a awm theih nan hma lak mek a nih thu leh Tripura atangin a pipe hi chak taka phum mek a nih thu a sawi a. Mizoram lei hnuaia oil leh gas zawn hna hi chak zawka kalpui a nih theih nan an bawhzui zel a, green energy lamah pawh hmasawn theihna remchang an neihte chak takin an thawk mek tih a sawi.
Chief minister chuan oil leh gas hi India a la intodelh lo va, an mamawh zaa sawmriat vel an la lut thin a. Khawvela hmang tam ram pathumna a ni tih a sawi a. Oil leh gas an hman tam hian boruak chhia, carbon dioxide leh sulphur dioxide te an siam chhuak a, chu chu mihring hriselna bakah thing leh mau leh sik leh saten ten an chhiatpui a. An renchem hian sum leh pai an ren tihna a ni a, ramngawte an duat tihna a ni bawk, a ti.
Oil leh gas hi insiam thar leh zung zung chi an ni lo tih sawiin Lalduhoma chuan, “Kan tu leh faten an rawn mamawh ve zel dawn bawk si a. Vawiina kan renchem hian kan tu leh fate tan kan lo dah tha tihna a ni tel a. Ni tin mamawh pawimawh tak an nih bawk si avangin renchem taka kan hman thiam a tul hle,” a ti bawk.
Inkhawmah hian Supply Minister B. Lalchhanzova pawhin thu sawiin, ni tin gas supply lamah harsatna tawh a nih loh nan an tang hle a. Mualkhang Gas Bottling Plant an tuai thar mek a, hna an thawk mek a. Oil supply chatlak vanga harsatna tawh thinte tihziaawm nan oil depot neih tumin an bei mek tih a sawi.
Petroleum Planning & Analysis Cell, India chhinchhiah danin, kum 2024-25 chhungin Mizoram hian Diesel (HSD) hi 119.20 Thousand Metric Ton, Petrol hi 58.83 Thousand Metric Ton leh LPG 34.6 Thousand Metric Ton hman ral a ni.