Aizawl: MPCC PAC member TT Zothansanga’n Thawhtannia an party chhung inkhawma Lengpui/Sihphir ram IAF hnena hralh nia sawi chungchangah DC Account-ah pawisa (Compensation Award) a luh ni, July 27, 2025 chiah sorkarin CBI General Consent a hnuhkirna order an tichhuak a, a hnu lawk (July 1, 2025)-ah Gazzette Notification a chhuak nghal anga a sawi chungchang chu ZPM General Headquarters-in thuchhuah siamin an chhang let.
ZPM General Headquarters thuchhuah chuan, TT Zothansanga’n thu diklo hul hualin sorkarna chelhtute a puh tih sawiin, The Mizoram Gazette Notification TT Zothansanga sawi hi July 1, 2025-a chhuak ni lovin, a hma kum, July 1, 2024-a VOL – LII Aizawl, Monday 01.07.2024 Issue No. 413-a tihchhuah a ni tih sawiin, “Hetianga ngaihbel theih deuh ang tura dawta sorkar puhna leh mipui bum tumna hi thleng tawh lo se kan ti,” an ti.