Ayodhya-a Ram temple sak hna zawng zawng chu April 30-ah zawh fel beisei a ni a, Rs vaibelchhe 1,900 vel sen a ni dawn tih Ram Temple Construction Committee Chairman Nripendra Mishra-a’n a sawi.
Ni hnih chhung Ram Temple Construction Committee thutkhawm zawh, Inrinnia thuthar lakhawmtute a kawmnaah Mishra chuan Larsen & Toubro (L&T) leh Tata Consultancy chuan a tih ngai chin an ching fel thawkhat tawh a, April 30-ah chuan zo felin temple complex hi an chhuahsan fel theih a beiseiawm tih a sawi.
Mishra hian he mi ni vek hian lehkha pawimawh tihfel ngai leh pawisa inpek ngai zawng zawng pawh an inpe nghal vek dawn niin as awi bawk.
“L&T leh Tata Consultancy hian an hna thawh zawng zawng hi kum thum chhung en zuia a chhia pawh siam that leh zel an tum a. Hemi atan bik hian an team tê deuh zawk chu temple complex-ah hian an la awm zui rih dawn thung a ni,” a ti.
April 30 hnuah hian L&T, Tata Consultancy leh State Construction Corporation nena inremna an ziah zawng zawng chu Shri Ram Janmabhoomi Teerth Kshetra Trust-in lain an keng zui tawh dawn tih a sawi bawk.
Temple sak nana sum sen zat chungchangah Mishra chuan Ram temple sak nan hian Rs vaibechhe 1,900 vel ruahman a ni a, GST telin Rs vaibelchhe 1,600 vel an seng ral tawh niin a sawi.
Ram Temple Construction Committee thukhawm hian hna thawh mek leh a kaihhnawih dang te, hna zawh hun tur leh mawhphurhna inhlan chungchangte an sawiho a ni.