Aizawl: Health & Family Welfare Department hnuaia Mizoram Health Systems Strengthening Project-in ni hnih awh tur a buatsaih, ‘Knowledge Exchange Health Conclave’ chu nimin khan Chief Minister Lalduhoma’n hawngin, Coffee Table Book a tlangzarh nghal.
Falkland Park, Aizawla hawnna inkhawmah chief minister chuan sorkarin mipuite hriselna hi ram hmasawn zelna atana thil pawimawh tih a hriat avangin mipuite hriselna lamah hma a la a. India-a health care system tha ber pawl a duang a. Empanelled hospital kaltlangin cashless-in damlote enkawl an ni, a ti.
Chief minister chuan hriselna hmunhma – district hospital te, CHC leh PHC te an thuam tha a. Thawktute tan khawl an lei a, hriselna lamah hmasawnna thar an thawk nasa hle. Heng hmalakna tam takte hi Mizoram Health Systems Strengthening Project kaltlanga an thawhte an ni a. He hmalakna neih theihna bul, World Bank chungah leh central sorkar chungah lawmthu a sawi.
India state hrang hrang atanga mipui hriselna lama mi thiam kal khawmte nen knowledge exchange an nei dawn a. Conclave zarah hmalakna tur tha zawk leh hriatna zau zawk neih an beisei a, India tana an thawhhonaah te, hma thar an lak zelna atan te a tangkai dawn tih a sawi bawk.
Health Minister Lalrinpuii pawhin thu a sawi.
Mizoram Health Systems Strengthening Projects hi World Bank sum hmangin kum 2021 khan kalpui tan a ni a. Kum nga chhung kalpui tur a nih angin kumin March thla hian a tawp tawh dawn a ni.