Aizawl: Chief Minister Lalduhoma’n digital service lama India rama hmahruaitu nih an duh thu a sawi.
Thawhlehni khan a pisa-ah Registrar of Cooperative Societies Computerisation hawngin chief minister chuan mipuite tana sorkar dawr dan awlsam leh rang hi an ngaihlu a, kum hnih chhung lekin chutiang hmalakna chu an nei nual tawh a. Hmalakna pawh a awm chho zel tih a sawi.
Digital service lama India rama hmahruaitu nih an duh tih sawiin, “Kan state a zim a, mipui kan tlem a, ziak leh chhiar thiam vekna state kan ni a, sap tawng hria kan tam a, digital service lama a tha ber nih theihna remchang kan neiah kan ngai a. Hma pawh kan la nasa a, kum hnih chhung hian online service portal hi 20 aia tam kan siam tawhin a rinawm,” a ti.
Chief minister chuan hmanni lawkah Mizoram CSR Connect portal an hawn hnu lawkah tunah Cooperation Department computerisation an han hawng leh ta hian khaw hrang hranga society-te tan awlsamna a thlen dawn a, a thawktute tan pawh awlsamna a pe dawn tih a sawi.
Inkhawmah hian Cooperation Minister PC Vanlalruata pawhin thu a sawi.
RCS Computerisation hi Mizoramah March 29, 2025 khan kalpui tan a ni a. RCS Office, Aizawl chauh ni lovin district hrang hranga an office-te a huam vek a. Cloud infrastructure atan hian INEXT Systems Private Limited, Zarkawt, Aizawl chu thlan an ni a, Software development hi National Informatics Centre Services Incorporated (NICSI) kaltlangin an empanelled firm Velocis Systems Pvt Ltd (CMMI Dev 2.0 Maturity Level 5), Noida, Uttar Pradesh-in software hi an siam a ni.