Labour, Employment, Skill Development & Entrepreneurship (LESDE) department-in Ministry of Micro, Small, medium Enterprises (MSME), national Scheduled Caste (SC)/Scheduled Tribe (ST) Hun nen tangkawpin thalaite tana intawhkhawmna leh hna hmuhna ni nghal tur, LESDE Kût chu February 10-14, 2026 chhungin Lammualah an buatsaih dawn.
LESDE Kût buatsaih tur chungchang hi nimin khan LESDE Minister Lalnghinglova Hmar chuan a pisa-ah thu thar thehdarhtute kawmin a sawi fiah a. Kût hi MSME, Self Help Group, kut hnathawktu, hna zawng lai leh entrepreneur-te, department inrelbawlna atana mamawh bungrua siamtute leh service petute thil siam leh service tihlar leh pho lan tumna a nih thu sawiin, Mizorama kût hawl zau ber tur a nih thu a sawi.
LESDE Kûtin a tum chu vendor, manufactural, service provider, buyer leh central leh state sorkar agency inkara remchanna siamsak te, tual chhung siam chhuah leh service tihhmasawn te, sorkar department mamawh, thil leh dan leh vendor registration kalphung hrilh fiah te, technology hmang tangkai tura fuih te, entrepreneur tan inpho chhuahna remchang siamsak te, thalai hna nei lo thiam tak takte tan ram pawna hnathawh theihna kawhhmuh te, aspirant leh entrepreneur-te tan thiamna leh hna awmte market nena inmil one-stop solution pek te a nih thu a sawi bawk.
Lalnghinglova Hmar chuan LESDE Kûtah hian department hmalakna pakhat angin hna zawng laite tan Job Fair buatsaih a ni dawn a, hetah hian firm hrang hrang 17 tel tura beisei an nih thu a sawi.
An hma lam hun tur chiang lo zirlaite tan career guidance buatsaih a ni dawn tih sawiin LESDE minister chuan, “Aizawl, Lunglei leh Siaha district-a Industrial Training Institute hnuaia skill development course hrang hrang buatsaihte chu he hun chhung hian pho lan a ni ang. Sub-Regional Employment Exchange hnuaia a thlawna course pek zawng zawng pawh programme neih chhung hian pho lan tur a ni. MYC hnuaia programme hrang hrang awmte hrilhhriat an ni bawk ang,” tiin, PSU parukten ‘Seminar cum Awareness Programme on PM NAPS’ an buatsaih dawn a, MPOCWWB-a inziak lutte tan Eizawnna Kailawn leh Rahbi Chhertu Scheme hawn a ni dawn tih a sawi.
LESDE Kûtah hian Florist Association, Pangpar Zuar Association, Art Exhibition, food court, naupang intihhlimna hmunte pawh a awm dawn bakah a tawp niah fashion show leh concert buatsaih tel a nih dawn thu sawiin, “Rin aiin stall hi a ropui dawn a. Puipunna changkang tak, thalai tana intawhkhawmna leh hna hmuhna a ni nghal dawn bawk a. Thalai a tam thei ang ber kal se, hmang tangkai se kan duh a ni,” a ti.