Aizawl: Tun hnaiah Aizawl khawpui chhungah hnam dang (vai) dawr a pung nasa hle a, heng dawr neitute hian chhiah an pe tlem hle tih sawiin enfiah thuai tul an tih thu Mizoram First hruaitute chuan Thawhlehnia Aizawl Press Club-a thu theh thehdarhtute an kawmnaah an sawi.
Mizoram First President ZR Thahmingliana’n an pawlin October, 2025 chhunga Aizawl khawpui chhunga hnam dang, a bikin vaiten sumdawnna an kalpui dan zirchianna atangin Kulikawn atanga Zemabawk inkar veng 24 huam chhungah hnam dang dawr a pung nasa hle a, a langsar chungah ringawt pawh dawr 122 zet a awm a. Heng dawr zinga a tam zawk, zaa 76.2 chu chu a neituah Mizo hminga awm; mahse, a nghaktu zawng zawng vai an nih avangin a hlawkna tel tak taktu chu vai an ni tih a chian hle thu a sawi.
Heng hnam dang dawr 122-ah hian vai hnathawh 342 awmin, chung zinga zaa 34-te chu ILP pho lan tur nei lo an nih thu sawiin, Assam leh Bihar atanga lo kal an tam ber a. GST pe an tlem hle tih a sawi bawk.
ZR Thahmingliana chuan an zirchianna atanga a lan danin tun ang inenkawlna satliah ringawt chuan state ecomony a venghim zo tawh lo tih a nemngheta an ngaih thu leh, chumi lak atanga a him nan a rang lama digital monitoring tool/system hman a tul a. ILP vilna (Real tume Visitor Tracking) siam tur te, sumdawnna chhinchhiahna (Digital Business Mapping) siam tur leh chhiah pek dan vilna (Automated Compliance) siam turin thuneitu a ngen.
An zirchianna atang pawhin Aizawl khawpui chhungah hnam dangin sumdawnna an thunun nasatzia te, chhiah pumpelh an tamzia te leh a vil zuina hman lai chak tawk lohzia a lang chiang hle tih sawiin Mizoram First president chuan, “Kan ecomomy derthawnzia leh thawm nei lo va inchimralna (sumdawnna hmanga inchimralna) thleng mek hi a taka hmuh theihin a rawn phawrh chhuak a. Kan dan neihte hmangin, inchimral theih kawng awm thei laka inven nan kan hman a tul a ni,” a ti.
Hemi kawnga hmalakna tur tul nia an hriatte chu chief minister leh a mawhphurtu department hrang hrang minister-te hnenah an thlen tih a sawi bawk.