Kumin Valentine’s Day-a Aizawl International Half Marathon (AIHM) 2026 neih turah lawmman Rs. muai 15 sem chhuah a ni dawn a, dawn tum zingah Africa khawmualpui mite pawh an tel.
Nikuma hlawhtling taka buatsaih tawh, AIHM-ah hian category pakuaah inelna a awm dawn a, lawmman sem chhuah tur hi Rs. nuai 15 a nih thu Sports Minister Lalnghinglova (Tetea) Hmar chuan a sawi.
Thawhlehnia a pisaa thuthar lakhawmtute a kawmnaah minister hian kumina AIHM neih tur chungchang a sawi fiah a. Category tinah lawmman hi pakhatna atanga pangana thleng pek an ni dawn.
Inelna hautak ber, km 21 intlansiak mipa leh hmeichhiaa pakhatnain Rs. 2,00,000 ve ve an dawng ang a. Pahnihnain Rs. 1,50,000 ve ve, pathumnain Rs. 75,000 ve ve an dawng bawk ang.
Km 10-a thui intlansiakah mipa leh hmeichhia pakhatnain Rs. 75,000 ve ve, pahnihnain Rs. 50,000 ve ve leh pathumna Rs. 25,000 ve ve an dawng ang.
Km ngaa thui intlansiak chu mipa, hmeichhia, senior bakah mipa leh hmeichhia naupang tan tlan theih tura ruahman a ni a. Heng category pangaa pakhatna hian Rs. 20,000 theuh, pahnihnain Rs. 12,000 theuh leh pathumnain Rs. 10,000 theuh an dawng dawn a ni.
Tetea’n a sawi dan chuan tun tum intlansiak turah hian India ram hmun hrang hrang atang bakah ram pawn atang pawin tel tum an awm tih a sawi.
Kenya leh Ethiopia atanga tel tumte chuan visa an buaipui fel vek tawh a, Protected Area Permit (PAP) an buaipui mek a, an hlawhtlin ngei a beisei tih minister chuan a sawi.
AIHM 2026-a el tur hian registration fee Rs. 799 niin ram pawn mi tan $ 30 a ni a, AIHM website-ah inziah luh theih a ni a. Online-a inziak lut remchang lo tan pawh Febriary 12 leh 13 hian Lammuanal inziak luhna hawn a ni ang.
Naupang leh senior bik chu Lammualah chauh hian ziah luh theih a ni dawn a, a man pawh Rs. 499 a ni dawn a ni.
AIHM hi a vawi khat nan nikum April 26 khan buatsaih niin mi 1,500 vel an tel a. Athletics Federation of India (AFI)-in a pawmpui niin Sports Authority of India (SAI)-in a hriatpui a ni bawk.
Intlansiak hi zing dar 06:30 veah km 21-a thui tlan turte vai liama tan a ni ang a. Minute 15 dan zelah category dangte hian an zui tura ruahman a ni a. Rejiv Gandhi Stadium, Mualpui, Aizawl atanga tlan tanin hetah bawk hian a tawpna pawh a ni dawn a ni.
AIHM 2026 hi Mizoram sorkara Sports & Youth Services Department leh Innovations India tangkawpin an buatsaih tur a ni.