Aizawl: Ni hnih awh tur ‘International Conference on Recent Advances in Environmental Research, Biodiversity Conservation and Sustainable Development’ chu Pachhunga University College Auditorium-ah nimin khan PWD Minister Vanlalhlana’n a hawng.
Department of Environmental Science, Pachhunga University College leh Society for AgroEnvironmental Sustainability, Dehradun, Uttarakhand te tangkawpin an huaihawt conference hawngtu Minister Vanlalhlana chuan, ramngaw leh nungcha tihchereu nasat avang te, sik leh sa inthlak danglam nasat avang tea harsatna hrang hrangte hian khawvel a nghawng a ni mai lo va, khawtlang nun, eizawnna leh thangthar zel turte thlengin a chhe zawnga nghawng tha lo nei thei a nih avangin, ram hmasawnna hna thawh leh environment humhalhte hi inkhuangrual taka, fimkhur taka kalpui a ngaih thu a sawi.
PWD Minister chuan ram hmasawnna hna thawk tak tak tur chuan kawng laih te, in lian tak takte leh infrastructure hrang hrangte din tur chuan ram ngaw, thing leh mau ten an tawrh chang a awm fo thin avangin, hun lo awm leh zel turah inkhuangrual taka development leh environmental conservation te hi kalpui a nih zel a tul tih a sawi.
Khualzahawm Education Minister Dr. Vanlalthlana pawhin, chhuan lo la awm lehzel turte tana chenna tlak ram nuam leh hrisel nei turin zirlaite leh hmasawnna hna duangtu ten tangruala, uar lehzuala zirbingna kalpui deuh deuh a ngaih thu te a sawi bawk.
He hun hi Dr. Kulendra Chandra Das, HoD, Dept of Environmental Science, PUC chuan kaihruaiin, Dr. Hilda Lalrinpuii, Asst. Professor, Department of Environmental Science, PUC; Prof. H. Lalthanzara, Principal, PUC leh Dr. Lallawmkimi, Asst Professor, Department of Environmental Science, PUC te’n thu an sawi.
International Conference hi online leh offline mode-a kalpui niin Mizoram mai bakah, ram pawn atangin zirlai leh mi thiam rualte’n Environment, Biodiversity leh Sustainable Development chungchanga thupui chi hrang hrang thlanchhuahte hmangin thu sawi leh zawhna leh chhan hunte an hmang ho dawn a ni.