Tun hma atangin mizote thinlungah ramsa kap thei leh kap tam ngaihsanna a lian a, intihtheih nan tak pawha hman thin a ni.
Tun hma hunah chuan a tulna chen pawh a lo awm a ni thei. Mahse, khawvel a changkang zel a, ramngaw leh nungcha an chereu nasain, an ngampa lo telh telh a, an chenna hmun thlenga kan daidarsak nasat tak hnu phei chuan hmuh tur an vang ta hle.
Hetiang a nih avang hian khawvelin a ngaihven tawh a, humhalh leh duat an tul thu an aupui nasa tawh a, kan ramah ngei pawh humhalh leh khuahkhirhna a nasa tawh hle.
Dan hmangin ramsa leh sava lam chi reng reng pelh leh veh khap a ni tawh a, a hremna pawh a nep lo. Ei atana tlak loh leh an rem mai hlauhawm ramsa leh savate hi kan duat a, kan humhalh a tul a, chutiang tura kan inzirtir nasat pawh a tul hle bawk.
Silai chi hrang hrang, dan phal chin leh phal loh chin thlengin nei kan tam tawh hle a, a tam zawk phei chuan intihtheih nan an hmang hial tawh a niawm e. Heng mite hian ramsa leh sava pelh leh veh nan an hmang nasa hle a, thuneitute mansak pawh an tam tawh viau.
Dan hmanga ramsa leh savate hi humhalh an nih miau tawh avangin a hremna pawh a nep lo hle tih kan hriat a tul a, kan fimkhur pawh a tul hle. Tum loh deuhin thubuai kan awrh thei tih hrerengin ramsa leh savate duatin, i humhalh zawk ang u. Silai ni lovin thlalakna hmanga pelh leh veh kawnga kan thanharhna a tul hle.