Aizawl: Mizoram Legislative Assembly Speaker Lalbiakzama’n nimin khan Khawruhlian leh a chhehvel khuain an thlai tharte zawrhchhuah nan leh dah that nana hman tura ruahman, Roadside Agro-based Product Market Building lungphum chu Khawruhlianah a phum.
Lungphum phumna inkhawmah Speaker chuan market sak tur chu mipui project, Khawruhlian chhehvel khua zawng zawng chhawr tur a ni tih a sawi a. Khawruhliana sum leh pai thawhchhuah kawnga hnung tawlh dawrhna a thlen loh nana a khaw dinthar dan tur a ngaihtuah nasat thu sawiin, khawchhung kawng siamthat hna chu thawh a ni tawh a, a tul dan azirin a hun bi pangngaia a kal chhoh zel tur thu a sawi a. Link road tha zawk siam dan leh hmun fianrial a nih avangin tourism lama hmalak dan ngaihtuah mek a nih thu a sawi.
Lalbiakzama chuan market chawm tur tharchhuah leh lakkhawm chu awlsam zawka siam a la ngai dawn tih sawiin, market chawm tur thlai thar phurchhuahna kawng Agriculture link road mamawh a nih tur thu a sawi a. Market project chu a bial chhunga project hmasa ber a nih angin project lo awm leh zel thawktute tan entawn tlak, department mit tlung, a sak dan thatna kawnga buk lung ni tura a duh thu a sawi.
Agro-based Product Market Building sak tur hi SASCI, 2024-25-Part-V-ah Mizoram sorkar chuan Agriculture & Farmers’ Welfare Department-in a implement turin a pawmpui a, hemi atan hian fund pawh Rs nuai 300 hmuh a ni tawh a. A building hi chhawng thuma sak tur a ni.