Aizawl: State Day of Prayer Organising Committee-te leh sub-committee hrang hrangten nimin khan Mizoram State Day puala State Day of Prayer hman tur inpuahchahna kal mekte an sawi ho.
Dawrpui Multipurpose Hall-a thutkhawm hi State Day of Prayer Working Chairman F Rodingliana, P&E Minister-in a kaihruai a. Sub-committee atangin inpuahchahna report ngaihthlak a nih bakah hmalakna tur la awm te, Zaipawl Pui leh Praise Team kalpui dan tur pawh an sawi ho va. tawngtairualna hun hman a ni bawk.
State Day of Prayer hi State Day of Prayer Committee kaihhruaina hnuaia kalpui niin, a tul dan azirin sorkar nen thawk dunin nikum pawh khan sorkarin a hrana official programme nei lovin Chief Minister Lalduhoma leh a thawhpui ram roreltute nen AR lammual-ah ‘I ram lo thleng rawh se’ tih thupui hmangin tawngtaina hun hman a ni.
Kumin hi Zorama harhna thlen kum 120-na a nih angin February 18-20, 2026 inkar hi ram tana chaw nghei tawngtaina neih turin a ruahman a, thupui atan ‘I dinthar leh ang u’ (Neh 2:17) thlan a ni a. Zofate hmun hrang hranga awmte mahni awm hmunah a theih ang anga hmanpui turin sawm an ni.