English rawlthar Max Dowman chuan Arsenal chhuahsan a la tum lo va, a la naupan avangin contract pangngai la ziak thei lo mah se December 31 a kum 17 a tlin hun atan a ziak tho.
Dowman hi kum 16 niin December 31-ah kum 17 a tling dawn a. Arsenal-in contract pangngai an ziahpui thei tawh dawn a, chu mi hma chuan a rinawmna lantir turin thuthlung a ziak a, awm ngheh zel a tum hle.
Kum 15 leh ni 302 niin nikum October thla khan Carabao Cup 4th round-ah Arsenal tan inlanin Brighton an hneh a, Gunners tana bul tan thei naupang ber record a siam a. He mi thlaah tho hian Arsenal-ah scholarship a tifel bawk.
November thlaah Champions League-a Slavia Prague an hneh khan a khel ve a, kum 15 leh ni 308 niin Champions League khel thei naupang ber record thar a siam bawk.
August thlaa Arsenal-in Leeds United an hnehin substitute bench atangin a lut a, Premier League leh Arsenal tana inlan thei naupang ber dawttu niin kum 15 leh ni 235 a ni a, Ethan Nwaneri (kum 15 leh ni 181) hnuaiah a awm a. He mi hnuah hian inelna hrang hrangah senior team tan vawi nga a inlan tawh.
November thla tir lam atang khan Mikel Arteta chuan a chhawr zui leh tawh rih lo a, December thlaa entu awm loa friendly an khelhah telin a ke rek a tihnat avangin senior team-ah a tel zui ta lo.
A ke na a dam huna senior team-a a tel leh a niha tun season chhunga goal a thun a nih chuan Dowman hi Arsenal tana goal thun thei naupang ber a ni dawn a. December, 2003 khan Cesc Fabregas chu club tana thun thei naupang ber a ni a, kum 16 leh ni 212 a ni.
Dowman chuan, “Kei leh ka chhungte tan chuan Arsenal-in thuthlung min ziahpui hi a hlu tak zet a, he club hi kan duh ber niin, ka awmna hmun tur dik tak niin ka hria. Coach te leh ka teammate zawng zawngte chungah lawmthu ka sawi a, ka chhungte leh thiante chungah ka lawm em em a, anni vang hian tun dinhmun hi ka thleng thei a ni,” a ti.
Kum 8 a nih atangin Dowman hian Arsenal academy a zawm tan a, a thiamna avangin youth level inelna hrang hrangah a inlan hnem ve tawh hle a. Kum 13 a nihin Under-18-ah a tel tan.