Aizawl: Tun hnaia Lengpui Airport bula Indian Air Force (IAF) hnena ram hralh thu kal zelah Congress party chuan mantang ei tam tak nia lang chu ZPM Val Upa Council (VUC) inrawlha chhui chianga action la turin an phut.
An thuchhuahah Congress party chuan kum 2023 inthlan hma khan ZPM party-in thutiam an neih zingah VUC thuneihna leh an function chungchang a tel a, VUC chu ZPM hian an sorkar hma khan sorkar khalh ngiltu tur, zilh ngai zilh a, ban thei hial tura thuneihna pek an ni tih sawi ni mah se, tuna an thlen chinah an hnuhma leh inrawlhna hriat tur a awm lo va. ZPM sorkar hnuaia Lengpui ram, dan kalkana IAF hnena hralh a ni leh sum tam uchuak tak mantangah a kal ral chungchangah pawh hian VUC chu an awm nge awm lo tih hriat loh khawpin a reh hmiah mai niin an sawi.
He ram dik lo taka inleina chungchangah hian MNF sorkar kalta leh ZPM an inpuhtawnna karah party pahnihte an fihlim lo va; mahse, pawisa dawngtu zawk chu an awm tih Hriata Chhangte chuan YouTube-ah a sawi chiang a, kut an thlak ve ve avangin inpuh tur chuang bik an awm lo tih sawiin, ram leh hnam pawi nasa takin an khawih a ni tih inpawmin Mizoram mipui hnenah ngaihdam dil a, an tihsual hi siam tha se an duh tih an sawi.
Congress party chuan VUC member-te chu ‘an sawi angin mizahawm tak tak, mi dik leh eirukna a fihlimte awmna’ niin a lang, an ti a. “Chutiang a nih avang chuan e Lengpui ram inlei dan dik lo leh eirukna lian tham tak awm anga langah hian hma an la lo a nih chuan an zahawmna nasa takin tlahniamin, an member-te pawhin mipui rin an hlawh loh theih avangin VUC chu thu an nei tak tak a nih chuan he thil dik lo leh tenawm takah hian kut kuangkuah mai lovin, chhui chiang se, ZPM ministry an lo inrawlh ngei a nih chuan hma lain mantang dawng an awm chuan chief minister pawh nise bân theihna thuneihna an neih angin bân se tih chu an ngenna a nih thu an tar lang bawk.